Tàm ală ù tiah geh làng bol kòn cau Prum ơm kis, 100% xã geh tơl khà ƀòn lơgar pa, geh gùng rơndeh lòt tus tàm tiah tờm, 100% tiah làng bol kòn cau Prum geh ngui ồs đèng, geh hìu sơnơm, geh hìu niam chài xã, geh hìu bơsram.

Priă geh bơh làng bol kòn cau Prum uă rơlao mờ khà hìu rơƀah kung ờ uă rơlao pơn drờm mờ khà bal bơh gùt càr Ninh Thuận dê. Tàm dơ̆ wă, Phó Thủ tướng Trần Lưu Quang kơ̆p kờñ ală cau kơ đơng broă yàng pơn jăt tai lơh tờm tàm broă lam sồr cau jăt yàng lơh jăt ală gùng dà broă lơh bơh đảng, dà lơgar, tàm broă prăp gàr, ngui bơhiàn niam chài ờs mờng uă bơta, pơgồp bal tàm broă lơh geh uă bơta niam chài ală jơi bơtiàn lơgar Việt Nam dê. Phó Thủ tướng đơs niam broă pơgồp bal bơh làng bol ală gah jăt yàng tàm tiah cau Prum càr Ninh Thuận dê là broă pơgồp bal uă ngan tàm broă bơtàu tơnguh càr bal mờ dà lơgar dê.