Kwang atbồ Cơldŭ lơh broă Quôk hội lài do ồng Bùi Ngọc Thanh là cau geh tŭ tơngai đềt mềr mờ Củ tịc Quôk hội ồng Nguyễn Phú Trọng bơh khoă 11, gơ wèt mờ ồng Thanh, Củ tịc Quôk hội ồng Nguyễn Phú Trọng geh dùl rài kis pơn dềt să mờ dờn song  ngan: “Tơngai mờ Củ tịc Quôk hội pa dờp kơnòl broă, Kwang atbồ cơldŭ lơh broă mờ Củ tịc Quôk hội lơh broă bơdìh tŭ jơ kung uă, añ kah nhai 8 nam 2006, geh dơ̆ mut pơrjum Ủy ƀan Thường vụ Quôk hội dơ̆ 42, kung kơlôi rơcang ală broă den tàng klò ngai añ lòt cribơyai tai broă dồ êt. Bulah tŭ hơ̆ anih lơh broă Quôk hội dê gam hat hal ngan, mơya bol hi kung gam rơndap anih lơh broă bơh Củ tịc dê geh anih ơm rlô ngai mờ geh anih nàng wă nac. Añ tus anih ơm rlô ngai den ờ gŏ Củ tịc, mut tàm cơldŭ wă nac kung ờ gŏ sơl, lòt tus cơldŭ lơh broă añ gŏ Củ tịc bic hơ đang jơnờng rơng, tê at sră nggal, bic sơƀing sền sơnơng. Añ lùp Củ tịc là bic bè do ơ, ñchi bơh tài ờ bic tàm cơldŭ ơm rlô, den Củ tịc hơ là cơldŭ ơm rlô he dê nàng lời ai dùl anih lơh broă ndai in. Dùl nă cau lơbơn niam ngan, pơn dềt să ngan. Añ sùm đơs là rài kis pơn dềt să bơh dùl nă kwang bàng kâp dờng dà lơgar dê”.

Bơh bơta pơn dềt să, đềt mềr den tàng bơta kah kir bơh Kwang atbồ Anih duh broă ală bơta mpồl bơtiàn bơh Quôk hội dê lài do mò Nguyễn Thị Hoài Thu gơ wèt mờ Củ tịc Quôk hội ồng Nguyễn Phú Trọng, hơ̆ là dùl nă cau geh mờng kwèng bơh làng bol mờ gơs, bơh làng bol mờ guh: “Tàm ală dơ̆ tìp mat cau tĕ khà añ ờ hềt gŏ tŭ lơi ồng Nguyễn Phú Trọng guh nggui hơđang hơ̆ sồng sền hơ đơm nàng cau in tàp tê, mờ ồng lòt bơh hơ đơm, kup tê 2 gah cơ gĕ. Tơnơ̆ hơ̆ hơ̆ sồng guh hơđang nggui iat mờ hơ. Hơ̆ là dùl mờng kwèng dùl nă cau bơh làng bol mờ gơs, bơh cau tĕ khà mờ gơs, ờ di là tus nàng nggui hơ đang nàng sồr lơh”.

Geh 2 khoă lơh broă bal mờ Củ tịc Quôk hội ồng Nguyễn Phú Trọng, mò Trần Thị Hoa Ry, Phó Củ tịc Mpồl duh broă Jơi bơtiàn bơh Quôk hội dê kah loh làng ngan bơta pơn dềt să bơh dùl nă cau geh bồ tơngoh jak, dùl nă cau jak chài, bềng nùs nhơm tŭ guh at gơnoar broă tàm ngai 26/6/2006: “Đơs guh at gơnoar broă Củ tịc Quôk hội, ồng neh đơs 2 jơnau tàm jơnau nrĭ kiều: “Kơlôi sơnơng să tờm he dê, rài kis lơ hơ bè ndar kơ yut. Rài kis geh lơm pòng halà wil mbè he git. Ai jơnau nrĭ kiều nàng đơs bè bè nùs tồr he dê bè hơ̆ den bol he gơtùi gŏ bơta git kơrhia, bơta pơn dềt să, kờñ bơsram tai bơh ồng dê tŭ geh jàu kơnòl broă kuơmàng do mờ kung là jơnau hơ pơrgon lơh ngan, geh kơnòl he dê gơ wèt mờ Đảng, mờ Quôk hội, mờ Làng bol”.

Ală cau ala mat Quôk hội neh lơh broă tàm ală khoă 11 mờ 12 ndrờm geh ală jơnau kah kir krơi is gơ wèt mờ Củ tịc Quôk hội ồng Nguyễn Phú Trọng. Phó Kwang atbồ Mpồl cau ala mat Quôk hội càr Thanh Hóa khoă 12 lài do ồng Lê Văn Cuông kung gam ngoh rơngac ngan tŭ yal bè ală dơ̆ đơng lam lùp, hơ jơnau lùp bơh Củ tịc Quôk hội ồng Nguyễn Phú Trọng dê: “Wa neh ai añ in geh lùp Ƀộ trưởng tus 3 dơ̆, tŭ añ ờ gam jơnau lùp tai den wa hơ̆ sồng sồr ơm. Tŭ gŏ Ƀộ trưởng gơ lơh kwi kuơ den wa neh tơngkah nàng Ƀộ trưởng in tơrgùm tàm jơnau hơ he dê. Bè hơ̆ den tàng dơ̆ lùp añ dê lơh geh cồng nha, ờ mìng duh hồl, gơ kờñ, cèng bơta gơlik geh pah ngai, geh mpồl bơtiàn jat sền cih dờp, jờng rơ, Wa đơng lam mờ dùl bơta jrô ơnàng, bồ tơngoh jak, ờ di pal pơhìn halà đơs kràñ, dong ală cau ala mat Quôk hội gơtùi lơh niam, kung dong ală Ƀộ trưởng tŭ hơ jơnau lùp kung ờ rơngòt, pin dờn mờ hơ jơnau lùp, jơh bal 2 gah ndrờm geh cồng nha lơh làng bol in niam nùs”.

Gơ wèt mờ ală cau ala mat dơ̆ sơn rờp lơh cau ala mat Quôk hội bè ồng Phạm Nam Tiến, Mpồl cau ala mat Quôk hội càr Dăk Nông den Tổng Ƀí thư ồng Nguyễn Phú Trọng là krơh niam àng gơ crà, niam ngan nàng ală cau ala mat Quôk hội in dodfm jat: “Tổng Ƀí thư sùm đềt mềr, sùm pơn dềt să, iat jơnau dan, jơnau đơs tă pơgồp bơh cau tĕ khà mờ làng bol dê. Mờ kuơmàng là Tổng Ƀí thư tŭ đơs jơnau đơs he dê sùm lơh dồ bă jơh nùs. Hơ̆ là bơta sền gàr bơngă pin dờn, nùs nhơm bơh kwang đơng lam bồ dê, bơh cau ala mat Quôk hội dê tềng đap làng bol, cau tĕ khà”.

Mờ gơnoar broă là Củ tịc Quôk hội khoă 11, khoă 12, Củ tịc Quôk hội ồng Nguyễn Phú Trọng sùm đềt mềr mờ Quôk hội, git loh bè rơndap broă, broă lơh bơh Quôk hội dê mờ geh ală tềl lời wơl kuơmàng ngan:

- Tàm pơdờn cau pa jơh tơngai lơh broă, ngai 06 nam 2006, tŭ gam tàm gơnoar broă Củ tịc Quôk hội khoă XI, Củ tịc Quôk hội ồng Nguyễn Phú Trọng neh đơng lam, sồr lơh jơh nùs jơh tồr ngan nàng Quôk hội lơh gơs jak ngan kơnòl broă jơh gùt khoă. Tàm dồ nam đơng lam, Quôk hội neh ring bal 13 adat, 11 jơnau lơh nền tàm pơrjum, tàm hơ̆ geh 3 jơnau lơh nền kwơmàng ngan geh gơtha kah yau dờng ngan, hơ̆ là Jơnau lơh nền tàm pơrjum Sền swì ring bal Jơnau hơ mŭt bal Jơnau ring bal tơnggơs Mpồl Kă bro phan dunia (WTO) bơh lơgar Kộng hoà Xã hội Củ nghĩa Việt Nam dê; Jơnau lơh nền tàm pơrjum bè Broă rơndăp lơh rơndăp ù tiah lơh hìu Quôk hội; mờ Jơnau lơh nền tàm pơrjum bè broă lơh jăt broă bơ̆t bơtàu kwơmàng dà lơgar nhơm- đèng- đạm Bà Rịa- Vũng Tàu.

- Tơngai lơh broă Quôk hội khoă XII, Quôk hội neh ring bal 67 adăt, 13 jơnau lơh nền tàm pơrjum. Tàm hơ̆ geh uă adăt lơh geh cơng tàng, bơnàng jă ai broă bơsong sa kwề sa kwà, bơta ờ niam tơnơ̆ do in bè Adăt tam gơl, bơtơl bàr pe bơta bơh Adăt Yal yă lơh tìs glài kŭp màng, Adăt tam gơl, bơtơl bàr pe bơta bơh Adăt lơh tìs glài kŭp màng, Adăt lơh jăt jơnau lơh nền bơh anih cah rña dê broă làng bol, Adăt Toh glài, Adăt ătbồ, ngui jơtài Dà lơgar dê…

- Quôk hội khoă XII geh bơta tam gơl dờng bè rơndăp tăp sèng mpồl, gơguh khà cau ala măt mìng lơh dồ kơnòl broă, ală anih lơh broă Quôk hội dê, bơh 8 anih lơh broă bè ală khoă lài neh gơguh tus 10 anih duh broă.

- Lồi tơngai lơh broă khoă XII dê, mờ bơta sồr lơh jơh nùs jơh tồr ngan bơh Mpồl duh broă tĕ khà dà lơgar dê, lam bồ là Củ tịc Quôk hội ồng Nguyễn Phú Trọng bal mờ ală anih lơh broă bơyai lơh tĕ khà tàm jơh gùt lơgar, dơ̆ sơnrờp lam lơh dồ dơ̆ lĕ bal dồ dơ̆ tĕ khà cau ala măt Quôk hội khoă XIII mờ jơh bal cau ala măt Mpồl duh broă Làng bol 03 kâp (tơngai lơh broă nam 2011- 2016) neh lơh geh cồng nha niam bơnĕ. Dơ̆ tĕ khà tềm pềr geh tŭ tơngai, priă jền phan bơna, bơta pràn bơh cau tĕ khà dê mờ neh ơn bơnàng jă kơ̆ kơl jăp ai ală dơ̆ tĕ khà tơnơ̆ do in.

Củ tịc Quôk hội ồng Trần Thanh Mẫn đơs wih đơs wơl, Tổng Ƀí thư ồng Nguyễn Phú Trọng là dồ nă cau geh nùs nhơm bồ tơnggoh ngăc ngar, jak chài ngan, bềng bơta kơ̆ nùs, bơta kơlôi sơnơng jak chài dipal ngan, bơta geh ngan tàm rài kis li la, cribơyai jơnau tàm sră pơ àr ngăc ngar àng loh, sơrlèt rlau mờ ală bơta kơlôi sơnơng bè ờs. Mờ 80 sơnam kis tàm rài kis, 57 sơnam Đảng, Ồng neh lời jơh dồ rài kis he dê ai jơnau kờñ niam bơnĕ bơh Đảng dê, là krơh àng gơcrà, lam lài bè nùs nhơm kăc màng bơh cau ling kộng sản dê, là cau lơh broă cíñ trị jak chài, ngăc ngar. Cau cribơyai jơnau tàm sră pơ àr jak ngan bơh Đảng dê, sùm jơh dồ rài kis tă pơgồp ơn pơdơng ai jơnau kơ̆p kờñ lơngăp lơngai is jơi bơtiàn in, củ nghĩa xã hội, tài bơta chờ hờp bơh Làng bol dê: Mờ gơnoar broă kơn jơ̆ ngan là cau đơng lam dờng ngan rlau jơh Đảng dê, dờp lơh uă broă lơh kwơmàng mờ Đảng, Dà lơgar jàu tàm hơ̆ geh gơnoar broă Củ tịc Quôk hội khoă XI, XII, ồng sùm tam klăc đềt mềr mờ Quôk hội, gĭt wă loh bè mpồl, gùng dà lơh broă bơh Quôk hội dê. Ồng sùm tơngkah tơl nă cau pal lời tŭ jiơ dipal ai broă lơh Quôk hội dê in, pal geh bơta gĭt wă jrô tàm broă lơh, geh bơta wă wờng jrô wil tơl bè Quôk hội nàng geh ală jơnau đơs tă pơgồp, jơnau jơnau đơs wơl jak chài. Ồng nting tơngkah: bơsram làng bol, bơsram bơta geh ngan, broă dong kờl, adăt boh lam ai lơh jăt bañ ơm ngài mờ rài kis. Bol he tă nhơm tă bơh rài kis dê, bơh plai nùs làng bol dê den ngan ngồn broă lơh bơh Quôk hội dê rơ̆p dipal mờ bơta mùl màl mờ geh cồng nha.