Bí thư Huyện ủy kơnhoàl Mù Cang Chải- ồng Nông Việt Yên pà gĭt: Nhai 6 nam 2019, Huyện ủy kơnhoàl Mù Cang Chải lam lơh mờ lơh jat broă lơh “Ngai lồi poh bal mờ làng bol” nàng kờñ sơlơ tơnguh tai bơta gơrềng tàm klăc bal rềp mềr đah kwang bàng, đảng viên mờ làng  bol, lơh kơryan ală tềl tơngŏ pơn hừ să, ngài làng bol mờ lơh jat broă lơh “crăp rcang, rcang lài tơm bơh bơr mờ làng bol, iăt kơno làng bol, jơh nùs, jơh pràn drơng broă làng bol”.

 Jat hơ̆, tơl nă kwang bàng, đảng viên bơdìh mờ kơnòl broă lòt tàm ƀòn lơgar jat broă lơh ờs mờng den pah nhai pal lơh is rơndăp tŭ tơngai, broă lơh, lời ết ngan rlau jơh 2 ngai lồi poh nàng tus mờ làng bol tàm ală thôn, ƀòn geh jàu, drơng broă nàng mblàng yal gùng dà broă lơh bơh Đảng, adat boh lam bơh Dà lơgar dê; dong kờl làng bol bơtàu tơnguh lơh sa, tơn jơh jơgloh, tơrmù rƀah; tơnguh uă ngan rlau jơh nùs nhơm rcang sền ngăc tềng đăp ală jơnau đơs ờ di dră wơl mờ Đảng, Dà lơgar tus mờ làng bol, gĭt loh ală bơta, nùs nhơm, bơta kơ̆p kờñ bơh làng bol dê, bal mờ làng bol tă bơsong ală bơta kal ke, ờ suk tàm rài kis, nùs nhơm, lơh broă sa bơh làng bol dê. Ồng Nông Việt Yên, pà gĭt: “Mờ jơnau kờñ tus nam 2030 Mù Cang Chải ờ gam là kơnhoàl rƀah tai, bol añ sền gĭt “Ngai lồi poh bal mờ làng bol” mờ là kơnòl broă, mơkung là broă lơh bơtàu tơnguh pràn. Dơ̆ 2 tai là, hơ̆ là tiah ai Mpồl lơh kơnòl broă sùm, Mpồl đơng lam đảng ƀộ kơnhoàl bơsram tàp mờ jờng rơ kwang bàng. Dơ̆ 3, ai bơta hơ̆ lơh jơnau kờñ mờ lơh ală bơta nàng sền sơ wì broă lơh lơh krơh bơh kwang bàng, lơh bè lơi lơh geh bơta đềt mềr, rềp mềr niam rlau tai đah kwang bàng, đảng viên mờ làng bol".

Bơh 5 nam lam lơh jat broă lơh “Ngai lồi poh bal mờ làng bol”, mờr 30 rơbô dơ̆ kwang bàng, đảng viên, kông cứk, viên cứk, cau lơh broă; rlau 90 rơbô dơ̆ làng bol neh tus bal ală broă lơh, bơnah broă geh ngan tàm ală ƀòn, sơnah ƀòn. Cồng nha là lơh kơnhăp geh rlau 300 kơi sồ gùng lòt ƀòn lơgar mờ lơh pa geh rlau 62 kơi sồ gùng ù; lam lơh rlau 25 rơbô 500 dơ̆ mblàng yal gùng dà broă lơh bơh Đảng, adat boh lam Dà lơgar; bơtàu tơnguh lơh sa- mpồl bơtiàn, rcang lài pleh kòp aniai, dră mờ cau lơh tìs.

Ală broă lơh do neh pơgồp bơnah lơh muh mat ƀòn lơgar tàm Mù Cang Chải ngai sơlơ geh tam gơl niam; priă lơh geh kờp bal tơl nă cau nam 2023 lơh geh 34 tơlak dùl nă cau, gơguh 70% pơndrờm dùl tŭ bal mờ bồ tơngai lơh broă. Kờp bal bơh bồ tơngai lơh broă tus tŭ do, pah nam kơnhoàl ndrờm gơmù rlau 9% khà hìu bơnhă rƀah, ai khà hìu bơnhă rƀah jơh gùt kơnhoàl dê gơmù gam 38,45%. Mò Giàng Thị Khua, làng bol tàm xã Hồ Bốn, kơnhoàl Mù Cang Chải brờn brài ngan đơs: “Tơl nă cau brờn brài ngan tài bơh uă cau lơh bal rlau mờ dồ nă cau lơh; is ồn là jơh bal gùng mut tàm hìu he dê kung geh ală kwang bàng tus lơh bal mờ dong kờl bal sơl. Đah làng bol mờ ală kwang bàng geh rềp mềr rlau uă ngan”.

Să tờm lòt tơn tàm ƀòn lơgar bal mờ làng bol tàm uă dơ̆ lồi poh, Ƀí thư  Tỉñ ủy càr Yên Bái- ồng Đỗ Đức Duy đơs: ală nhai bồ nam 2019, tơnơ̆ tŭ Mpồl Lơh kơnòl broă sùm Huyện ủy kơnhoàl Mù Cang Chải yal bè ală jơnau kơlôi sơnơng bơh sơnrờp tàm broă bơyai lơh jat broă lơh “Ngai lồi poh bal mờ làng bol”, sền gŏ do là broă lơh hòi jà làng bol gơnoar atbồ geh cồng nha, geh bơta niam ngan uă, di pal mờ bơta geh ngan, Mpồl Lơh kơnòl broă sùm Tỉñ ủy càr Yên Bái neh ring bal sac rơwah kơnhoàl Mù Cang Chải lơh mpồl lơh broă lam lài, tơnơ̆ hơ̆ ai bơta mờng chài lơh broă den hơ̆ sồng lơh gơ rề uă broă lơh tus mờ jơh gùt Đảng ƀộ càr dê.  

Tơnơ̆ mờr 05 nam lơh jat ală broă rơndăp lơh Mpồl lơh kơnòl broă sùm Tỉñ ủy càr, Broă lơh “Ngai lồi poh bal mờ làng bol” neh hòi jà geh bơta tus bal bơh uă ngan kwang bàng, đảng viên mờ làng bol tàm ală bơta lơh is, dong kờl is, ờ gŏ di lơh gời lơm, ntoăt jat cồng nha gời lơm. Mpồl kwang bàng, đảng viên ờ pleh, ờ rơngòt kal ke, bòl glar neh sơm bat tê bal lơh ală broă lơh, bè: pơs wàs sàng goh tiah ơm kis, khòm tơrgùm sồ siă, lơh hìu niam chài, lơh gùng lòt ƀòn lơgar, dong kờl làng bol bơtàu tơnguh lơh sa. Ồng Đỗ Đức Duy, đơs: “Bol añ pơn jat tai tơn jơh, sền wơl, rề ơnàng ală broă lơh, cau pơn rơ jak ngan, ală broă lơh niam mờ geh cồng nha pơgồp bal mờ broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê. Do là broă lơh sùm, sùm sùm, kung là dùl tàm ală broă lơh đơng lam mờ đảng ƀộ càr dê lơh, mơkung là dùl tàm ală broă lơh nàng lơh jat geh kơnòl broă lơh krơh, bơta lam lài, lơh krơh niam bơh kwang bàng, đảng viên dê tàm broă lơh broă tàm ƀòn lơgar, tam klăc bal rềp mềr mờ làng bol”.

 Geh cồng nha broă lơh “Ngai lồi poh bal mờ làng bol” neh mờ gam pơgồp bơnah uă ngan nàng kơnhoàl Mù Cang Chải in gờñ lơh sir ală jơnau kờñ mờ Jơnau lơh nền tàm pơrjum dờng Đảng ƀộ càr mờ Jơnau lơh nền tàm pơrjum dờng Đảng bộ kơnhoàl, tơngai lơh broă bơh nam 2020-2025 dê neh ai, ai tiah do gờñ gơ gơs kơnhoàl lòt nhơl, tiah tus “Bơhiàn niam chài, lơngăp lơngai, rềp mềr” bơh càr mờ gùt lơgar dê; tus nam 2025 sền bal là lik klàs bơh sră ală kơnhoàl rƀah mờ kơ̆ kơl jăp cơnđoà lòt tàm gùng lòt tam gơl pa, mut gơrờm bal mờ bơtàu tơnguh.