VOV4.K’ho - Đềt mềr mờ broă bơto tàm hìu bơsram tàm kơnhoàl tiah ngài Krông Bông, càr Dăk Lăk, pơgru Nguyễn Viết Lân ai uă ngan tơngai kơlôi sơnơng, jòi nàng wă bè rài kis bal mờ broă lơh bơh Củ tịc Hồ Chí Minh dê. Mờ pơgru, jòi nàng wă bè Bác Hồ ờ mìng là nàng git wă uă bơta ngăc ngar bơh să tờm dê mờ gam bơsram tàp is, lơh ngan bơsram mờ lơh jăt jơnau bơto bơh Bác Hồ dê tàm tơl broă dềt pah ngai.

   Pơgru Nguyễn Viết Lân (tàm gùl) dờp khà pơn jờng ơruh pơnu gơguh jăk lơh jăt jơnau bơto bơh Bác Hồ dê

Tơnơ̆ mờ ală tŭ neh jơh bơto tàm hìu bơsram, pơgru Nguyễn Viết Lân, bơto môn Tin học, hìu bơsram kấp 3 Krông Bông, kơnhoàl Krông Bông, càr Dăk Lăk ai uă ngan tơngai ơm tàm thư viện hìu bơsram ha là pờ internet nàng jòi jơnau git wă bè Bác Hồ. Pơgru Lân yal, bŭ lah bơto Tin học, mơya pơgru gơboh ngan mờ broă jòi nàng git wă bè lịc sử. Bơh tŭ gam dềt, ală jơnau yal bè Bác Hồ geh mè bèp, cau pơgru yal wơl neh lời wơl pơgru in ală jơnau ngoh rơngăc krơi is ngan. Bơh ală jơnau yal bè broă bơto bơtê mờ bơsram bơh Bác Hồ dê neh geh tàm nùs nhơm pơgru dê geh jơnau bơgoh kờñ mờ broă bơto sră mờ tàm tiah pôs đồng kăc màng Krông Bông neh gơs ƀòn lơgar dơ̆ bàr mờ pơgru kis đềt mềr tàm mờr git nđờ jơ̆t nam do. “Añ kờñ ngan jòi ală jơnau yal bè Bác Hồ, ală rài lài do mờ gơrềng tus mờ Bác Hồ den añ ndrờm gơboh lơm mờ jòi nàng git. Sền ală tơngu me pa nàng tơmŭt tàm ală tơngu me jơnau bơto să tờm dê nàng niam mờ lơh kơnòm bơsram ờ hoan gơtìp dil. Bè broă lơh Đoàn den tàm broă añ bơyai lơh den pal lơh bè lơi nàng ai geh ală tơngu me mùl màl, lơh ală kơnòm bơsram kờñ gơboh, bơh tŭ hơ̆ geh hòi jà ală kơnòm bơsram, bơh ală kơnòm bơsram ờ khin tus bal ală dơ̆ pơrlòng mpồl, ală mpồl pơrlòng, bơh tŭ hơ̆ ai kơnòm bơsram geh rềp bal rơlao”.

           Pơgru Nguyễn Viết Lân bal mờ Ci đoàn còp mờ pà phan cau mè Việt Nam khin cha jăk chài in

Jơh bơsram tàm hìu bơsram Đại học Sư phạm Huế, nam 2014, pơgru Lân geh rơwah mŭt bơto tàm kơnhoàl Krông Bông. Sơn đàc kơnòm bơsram tàm tiah ngài gam uă kal ke, pơgru ai jơh bơta ngăc ngar nàng bơto kơnòm bơsram. Pơgru rơcang pờ tàm internet nàng jòi geh jơnau yal niam, gơhòi jà kơnòm bơsram. Tơl tŭ bơsram, pơgru sùm lơh ngan lùp lăp mờ kơnòm bơsram, ai geh jơnau nàng ală kơnòm bơsram geh nùs nhơm niam, tơnguh bơta pràn bơsram is, bơceh lơh mờ dong kờl ală kơnòm bơsram jòi geh bơta chờ, bơta niam tàm tơl jơnau bơsram. Oh Hoàng Thị Kim Ngân, bơsram ơdŭ 11A7, hìu bơsram kấp 3 Krông Bông yal: “Oh gŏ pơgru Lân là dùl nă cau pơgru jơh nùs tàm broă bơto sră, jơh nùs ngan, rơcang lài pơgồp bal mờ ală bơyô bơsram nàng bơto ai ală bơyô bơsram. Pơgru neh lơh ngan bơto lơyài ngan nàng ală bol oh wă jơnau bơsram. Pơgru sùm iăt ală jơnau bơh kơnòm bơsram tai. Mờ oh tơnơ̆ mờ dùl tơngai iăt jơnau bơh pơgru Lân mờ iăt pơgru Lân bơto den oh kung wă tai uă ngan jơnau ngăc ngar pa ai să tờm in mờ lơh ngan nàng bơsram jăk”.

          Pơgru Nguyễn Viết Lân bơyai lơh tă pơgồp priă tàm broă lơh nùs nhơm dong kờl hìu bơsram dê

Ờ mìng là cau pơgru jơh nùs tàm broă bơto, pơgru gam kơnòm să Nguyễn Viết Lân gam là kwang bàng đoàn ñhăp ñhar ngan. Pơgru là Ƀí thư chi đoàn cau pơgru, geh jơng tàm Ƀan cấp hành Đoàn hìu bơsram mờ Củ tịc mpồl tam klăc ơruh pơnu hìu bơsram kấp 3 Krông Bông dê.

Ồng Dương Kim Thạch, Kwang atbồ hìu bơsram kấp 3 Krông Bông pà git, bŭ lah gam kơnòm, bơta lơh sa gam kal ke mờ gam pal ơm tàm hìu ơm bal, kòn gam dềt, pơ-ùr lòt lơh broă ngài mờ hìu, mơya pơgru Lân gam sùm rơndăp tơngai să tờm nàng lơh gơs niam ală kơnòl bal. Pơgru kung geh uă jơnau bơceh lơh broă mờng chài tàm broă bơto, dong kờl ală cau pơgru ndai bè kông nghệ thông tin, tàm hơ̆ uă ngan là tàm tŭ hìu bơsram pal bơto mờ bơsram tàm internet nàng rơcang sơndră mờ kòp Kovid-19. Ồng Dương Kim Thạch pà git: “Pơgru Lân là cau pơgru gam kơnòm, ñhăp ñhar, bơceh lơh mờ tus bal uă ngan tàm ală broă lơh bè đoàn ơruh pơnu, lơh broă geh kơnòl ngan. Pơgru lòt lam sồr ală cau geh nùs nhơm niam, ală bơyô bơsram tàm ală ơdŭ, hơ̆ sồng ală bơyô bơto bal nàng dong kờl phan ngui, phan sa, priă nàng bơyai lơh geh ală dơ̆ tus tàm ƀòn dong kờl ală kơnòm dềt in bè ào ram tàm kàl mrềt. Ala măt Đoàn hìu bơsram kung bè là Mpồl tam klăc ơruh pơnu lòt còp, pà phan ai cau mè Việt Nam khin cha jăk chài. Bè tàm nam pa do pơgru kung gam ai uă ngan tơngai nàng tus bal pơrlòng jòi git wă bè ơnà jăk, nùs nhơm niam Hồ Chí Minh, mờ geh khà bàr gùt lơgar”.

Jơh nùs mờ broă jòi nàng git jơnau bè rài kis bal mờ broă lơh bơh Củ tịc Hồ Chí Minh dê, pơgru kơnòm să Nguyễn Viết Lân neh jòi geh is să tờm in sră geh kwơ bè Bác Hồ. Kơnờm mờ hơ̆ neh dong kờl pơgru geh uă cồng nha niam bè Khà dùl dơ̆ pơrlòng jòi nàng wă 110 nam Bác Hồ lòt jòi gùng dong klàs dà lơgar geh Tỉñ đoàn Dăk Lăk bơyai lơh nam 2021; 2 nam tơn geh khà dờng tàm dơ̆ pơrlòng “Cau kơnòm să bơsram mờ lơh jăt ơnà jăk, nùs nhơm niam, broă lơh bơh Hồ Chí Minh dê” bơh Ƀộ Giáo dục mờ Đào tạo bơyai lơh tàm nam bơsram 2020-2021. Pơgru kung là dùl tàm 45 nă ơruh pơnu geh pơn jờng bè ơruh pơnu jăk chài lơh jăt jơnau bơto bơh Bác Hồ dê geh càr Dăk Lăk bơyai lơh tàm nam 2022 do. Pơgru Lân yal, bơh broă tus bal ală dơ̆ pơrlòng, neh dong kờl pơgru geh tai dơ̆ niam nàng wă rơlao tai bè Bác Hồ, bơh tŭ hơ̆ geh tơnguh rơlao tai kơnòl bơh să tờm, lơh ngan bơsram jơnau Bác Hồ dê bơh ală broă lơh dềt ngan pah ngai.

Cau cih H Xíu- Cau mblàng Ndong Brawl