VOV4.K’ho- Ală càr Tây Nguyên geh rlau 2 rbô nơm bơtơ̆t tơnau dơng dà mờ bơta ơnàng tus gĭt nđờ jơ̆t rbô lồ. Broă ngui ală bơtơ̆t tơnau dơng dà ai ròng tam phan tàm dà mờ ală phan bơna, drơng broă bơtơ̆t tơnau dơng dà ndai gam gơtìp gơkòl tŭ lơh jăt ală jơnau cih bơh Adat Bơtơ̆t tơnau dơng dà nam 2017, Kơrnoăt 67 mờ Kơrnoăt 96 nam 2018 dê. Gĭt nđờ rbô lồ măt dà gơtìp pơhì pơhà tài bơh ờ gơtùi kĭ sră hơ pơrgon ai apah ròng tam phan tàm dà.

Ồng Nguyễn Trọng Nhi ătbồ tơnau dơng dà Vạn Xuân ơnàng pơgăp 5 lồ tàm khối 9, thị trấn Dăk Mil, kơnhoàl Dăk Mil, càr Dăk Nông tus tŭ do neh 20 nam. Ồng jòi kis mìng kơnờm tàm broă ròng ka tàm do. Mơya bơh nam 2018 tus tŭ do, kông ty bơtơ̆t tơnau dơng dà Dăk Nông yal ờ gơtùi kĭ sră hơ pơrgon ai apah măt ù tài bơh gơkòl ală jơnau cih bơh Adat Tơnau dơng dà dê, broă bơcri priă ròng tam phan tàm dà bơh ồng Nhi dê gơtìp gơkòl. Broă ătbồ, ngui tơnau dơng dà kung sơnđờm gơlik geh ală jơnau tam pìt tam phà, uă cau tus lơh ka mơya ờ gơtùi kơryan geh tài bơh ờ geh cơng tàng kơrnoăt boh lam. Broă gơlik geh jŏ jòng tus tŭ do neh 4 nam, ồng Nhi dan mờ Dà lơgar gờñ geh broă lơh bơsong ală bơta gơkòl nàng ồng gơtùi iang nùs bơcri priă. Ồng Nhi đơs: Dan bơh jŏ rao mơya gơkòl adat boh lam. Kĭ ai añ in sră hơ pơrgon lơh broă, añ hơ̆ sồng khin bơcri priă mờ tŭ do mìng là sền gàr bơtơ̆t tơnau dơng dà lơm mờ ờ gŏ khin bơcri priă ờ. Ờ kĭ sră hơ pơrgon den ƀươn ngan gơbàn bơta tam pìt, loh làng kơrnoăt boh lam den añ hơ̆ sồng khin bơcri priă dờng.

Jơh ală tơnau dơng dà tàm Tây Nguyên ờ tơl cơng tàng ai apah măt dà

 Ồng Bùi Phong Danh, Phó Kwang ătbồ anih lơh broă kơnhoàl Dăk Mil, Kông ty Trác ñiệm Hữu hạn Một thàñ viên lơh bơtơ̆t tơnau dơng dà càr Dăk Nông pà gĭt, jơh gùt kơnhoàl geh 43 tơnau dơng dà mờ dà dơng pơgăp 22 tơlak khối, bơta ơnàng măt dà rlau 300 lồ. Jơh ală tơnau dơng dà tŭ do ndrờm ờ gơtùi kĭ sră hơ ai apah măt dà mờ làng bol tài bơh gơkòl Adat Bơtơ̆t tơnau dơng dà nam 2017 mờ Kơrnoăt 67 nam 2018. Jăt ồng Danh yal, bơta gơkòl tàm do là jơnau cih bè gơnoar ngui ù tàm sră nggal jun mờ kâp geh gơnăp gơnoar in sền swì kĭ gùng dà broă lơh kă bro. Tàm tŭ jơh ală tơnau dơng dà tŭ do ndrờm ờ hềt geh ai sră ngui ù ai Kông ty geh gơnoar in. Ồng Danh, đơs: Nam 2017, càr geh dùl sră giă cih ai apah măt dà là 250 đong dùl thơk vuông tàm dùl nam. Càr den kung geh uă ngan cau kờñ apah, mơya gơkòl là tơnơ̆ Adat Bơtơ̆t tơnau dơng dà, Kơrnoăt 67, sồr ròng tam phan tàm dà pal geh sră ai gơnoar. Mờ kờñ pà sră ai gơnoar den pal geh sră nggal ù, mơya sră nggal ù càr ờ hềt jàu ai kông ty in den tàng kông ty ờ geh gơnoar.

Ồng Lê Viết Thuận, Kwang ătbồ Kông ty Trác ñiệm Hữu hạn Một thàñ viên lơh bơtơ̆t tơnau dơng dà càr Dăk Nông pà gĭt, jơh 250 nơm tơnau dơng dà tàm càr ndrờm ờ hềt geh pà sră gơnoar ngui ù. Bơta pơhì pơhà măt dà tàm ù tiah càr là uă ngan mơya kông ty ờ gơtùi lơh krơi, tài bơh ai apah là tìs mờ jơnau cih. Ală bơta gơkòl, bơta pơhì pơhà do digơlan geh gam jŏ jòng tài bơh ală tŭ lơh sră gơnoar ngui ù ai ală tơnau dơng dà in dùl bơnah là kal ke ngan, dùl bơnah tai là ờ gŏ geh priă jền. Sùm bơh nam 2018 tus tŭ do, kông ty rơ̆p mìng pa tă priă nàng lơh broă đo was, sơntơp jrong gùng gah kềng ờdo ờdă ai pơgăp 10 nơm tơnau dơng dà rơcăng pà sră gơnoar ngui ù in, geh khà ờ hềt tus 5%. Ồng Lê Viết Thuận, đơs: Nàng lơh dùl broă mờ pà gơnoar jàu ù, sơntơp jrong den pal sơnđờm bơh rơndăp broă, tus dan gơnoar, dan priă jền mờ ờ gŏ di là pal jàu là pà geh tơn ờ. Tàm tŭ ală sră cih bơh lài do sờr ntrờn ù tiah tơm priă ai ù ờ gŏ cih loh làng bè tŭ do. Lài do, mìng geh broă bơ̆t bơtàu tus pơrjum làng bol den mìng là cau pà ù, geh uă hìu ờ hềt geh tam gơl bă ù. Bơta do, den kung ờ gơtùi tuh tìs ai cau lơi in ờ tài bơh lài tus tŭ do gơ geh sùm.

Tây Nguyên geh rlau 2 rbô bơtơ̆t dơng dà pơhì pơhà tài bơh ờ gơtùi ai apah

Ồng Nguyễn Công Hạnh, Phó Kwang ătbồ Kông ty Tráč ñiệm hữu hạn Một thàñ viên lơh bơtơ̆t tơnau dơng dà càr Dăk Lăk pà gĭt, Ủy ƀan Ñân zân càr Dăk Lăk neh ring bal gùng dà lời kông ty in geh kĭ sră hơ pơrgon ai apah ing tŭ ờ hềt geh pà sră gơnoar ngui ù. Mơya, jăt Kơrnoăt 96 nam 2018 cih nền cê bè giă phan bơna, drơng broă bơtơt tơnau dơng dà mờ dong kờl priă ngui phan bơna, drơng broă geh kwơ bal bơtơ̆t tơnau dơng dà den kờñ pal bơh ală ƀộ gah lơh broă geh gơrềng kĭ ring bal. Ủy ƀan Ñân zân càr Dăk Lăk neh dan 2 nam do mơya kung gam ờ hềt geh ring bal sơl. Ală sră hơ pơrgon ai apah măt dà tàm 246 nơm tơnau dơng dà mờ pơgăp 2 rbô lồ kông ty ătbồ kung gam ờ hềt gơtùi lơh geh sơl, hoàc hươr gơwèt mờ kes priă dà lơgar mờ gơwèt mờ broă lơh ròng tam phan tàm dà digơlan gơguh tus rhiang tơmàn đong pah nam. Ồng Nguyễn Công Hạnh, đơs: Kông ty neh lơh broă rơndăp lơh giă pơyua tus Ủy ƀan Ñân zân càr in mờ Ủy ƀan Ñân zân càr neh geh sră nggal pơyua Ƀộ Nông nghiệp mờ Phát triển Nông thôn, Ƀộ Tài cíñ in mơya tus tŭ do kung gam ờ hềt geh kĭ sơl. Hơ̆ là kal ke dờng ngan nàng lơh, tài bơh tŭ ờ geh broă rơndăp lơh giă den ờ gơtùi kĭ sră hơ pơrgon ờ. Den tàng bè hơ̆ là hoàc hươr bè đah lơh sa. Dơ̆ bàr là tŭ mờ ờ ai gơnoar den gơlik geh jơnau làng bol geh tam pìt bal mờ gơp mờ lơh roh bơta lơngăp lơngai bơta rơndăp tăp sèng.

Nàng tă bơsong bơta gơkòl ai ală tiah in, ai tơl bơta lơh mờ ngui geh cồng nha măt dà ai broă lơh ròng tam phan tàm dà in đơs is mờ ală phan bơna, drơng broă bơtơ̆t tơnau dơng dà ndai in đơs bal, kờñ ngan pal geh bơta tus bal bơh ală ƀộ, gah lơh broă kâp dà lơgar dê.

Cau cih Công Bắc- Cau mblàng Lơ Mu K’Yến