VOV4.K’ho- Đảng he geh crơng gơs di tàm sơnam pa, sơnam pa bơh dà lơgar dê mờ jơi bơtiàn dê, bal mờ bềng lìu bơta gơboh gơbài, kơp kờñ ngan. 92 sơnam geh Đảng, bơngă dà lơgar dê ngai sơlơ geh đơs nền ờ mìng tàm tiah do mờ gam tàm gùt dunia tai. Tơngkah kir sơnrai Ngai crơng gơs Đảng là dùl ngai kah yau mut tàm plai nùs bơh git nđờ tơlak nă cau Việt Nam dê pah tŭ sơnam pa tus.

Kah yau 92 nam lòt bal mờ jơi bơtiàn, Đảng Kộng sản Việt Nam bè sơmañ àng gơ crà lam gùng, lam dà lơgar Việt Nam he bơh jai pha do tus jai pha ndai. Cồng nha mờ dà kơl hề hơ̆ àng gơ crà tàm git nđờ tềl kah yau neh cih, tàm ală tam gơl pa ngai pah ngai bơh dà lơgar dê, tơl nơm hìu, làm gùt ƀòn rềp ngài.

Xã Nâm Nung, kơnhoàl Krông Nô, càr Dăk Nông là tiah pôs đồng kăc màng tàm rài tam lơh mờ ling lơgar Tây bal mờ ling lơgar Mỹ sò tơm tơnklàs dà lơgar. Tơnguh bơhiàn Khin cha jăk chài, Đảng ƀộ, gơnoar atbồ bal mờ làng bol kis tàm xã Nâm Nung sùm lơh ngan sơrlèt mờ kal ke, brồ guh pràn kơl dang, bơ̆t bơtàu ƀòn lơgar ngai sơlơ tơnguh bơtàu. Gùt xã tŭ do geh rơlao 1 rơbô 900 hìu, mờ di pơgăp 8 rơbô nă làng bol, tàm hơ̆ geh di pơgăp 2 rơbô nă là làng bol kòn cau Mnông. Geh broă sền gròi bơcri priă bơh Đảng mờ Dà lơgar, rài kis làng bol geh gơguh sùm, nam do priă geh tơl nă cau tàm 40 tơlăk đong. Ồng Y Sram, kis tàm ƀòn R’Cập, xã Nâm Nung đơs: “Ưn ngài ngan Đảng, Dà lơgar neh ai tơl bơta niam làng bol kòn cau Mnông in đơs is mờ làng bol đơs bal. Tŭ do gùng che ồs đèng, hìu bơsram, hìu sơnơm neh geh tơl. Jơh ală oh kòn ndrờm geh tus lòt bơsram, ală hìu oh kòn tơl sơnam geh lòt bơsram tơl. Tơngai lài do, ờ geh hìu bơsram tài gam gơtìp kal ke, tàm hơ̆ uă ngan là tàm rài tam lơh, do là tiah pôs đồng kăc màng, làng bol gơtìp rơƀah mờ glar bòl ngan. Mơya tŭ do neh tam gơl uă bloh, rài kis làng bol tơnguh bơtàu uă ngan ờ gam bè lài do tai”.

Càr Dăk Lăk tŭ do geh 4 gah jat yàng dờng là yàng Bàp, Tin lành, yàng Phờk mờ yàng Cao đài, mờ rlau 600 rbô nă cau jat yàng, geh 32% khà kờp làng bol. Tàm ală ngai do, mờ bơta đơng lam bồ bơh Đảng dê, làng bol jat yàng ndrờm jơh nùs bơtàu tơnguh lơh sa, bơt bơtàu ƀòn lơgar, kis niam lơh àng sơdah jơnau yàng. Mục sư Y Ky Êban, atbồ hìu jum Tin lành Ea Tul, xã Ea Tul, kơnhoàl Cư Mgar, càr Dăk Lăk yal: Bơta chờ hờp bơh làng bol dê là dờng ngan, lòt di gùng di dà gah jat yàng, pin dờn tàm bơta đơng lam bồ bơh Đảng dê. Pơrjum dờng gùt lơgar dơ̆ 13 bơh Đảng dê lơh geh cồng nha niam ngan tàm nam lài kung là tềl tơnggŏ ai tơnggŏ bơta pin dờn mờ kơp kờñ ngan bơh tơl nă làng bol dê bè ală broă lơh nền di ngan, lam dà lơgar bơtàu tơnguh bè tơl gah. Kung jat mục sư Y Ky Êban đơs, tàm dơ̆ sơndră mờ kòp Kovid-19, gơnoar broă đơng lam bồ bơh Đảng dê gam ai tơnggŏ tàm bơta lơh ngan nàng cit jơh sơnơm vaccine ai jơh gùt làng bol in: “Tàm nam lài den Đảng mờ dà lơgar neh sền gròi, lơh gơlik bơta niam nàng làng bol in geh cit sơnơm vaccine nàng geh lik bơh bơta aniai kòp dờng Kovid-19 dê. Kơp kờñ tàm nam pa geh ờ gam kòp bơtờp, jơgloh rƀah mờ ală broă ờ niam gơlik geh tai, jơh tơl nă cau dùl nùs bal bơtàu tơnguh lơh sa, sơlơ tơnguh mpồl tam klac dờng jơh gùt jơi bơtiàn Việt Nam bè oh mi tờm dùl hìu.”

Cau geh đảng Lơ Mu Ha Dzô, kis tàm ƀòn 6, xã Dà Sar, kơnhoàl Lạc Dương, càr Lâm Đồng đơs, kơnờm mờ broă sền gròi, đơng lam bơh Đảng, gơnoar atbồ xã, kòp kovid-19 mhar geh sền gròi, dà lơgar tam gơl tus mờ bơta bè ờs pa, ai geh nùs nhơm pin dờn tàm làng bol: “Đảng mờ Dà lơgar sền gròi tus mờ làng bol uă ngan, bơcri priă lơh ală broă den tàng rài kis làng bol neh geh gơguh pơn drờm mờ lài do. Tŭ kòp Kovid-19 gơtờp, ală kấp, gơnoar atbồ neh di tŭ lam sồr mờ bơto sồr làng bol tơnguh jơnau git wă, tus bal lơh jăt ală broă rơcang sơndră mờ kòp Kovid-19 gơtờp mờ neh geh cồng nha niam. Tŭ do ƀòn lơgar gam gàr niam tiah tơlir ờ do ờ dă, rài kis lơh sa bơh làng bol geh ring niam mờ tơnguh bơtàu tài kơphe geh khà priă. Nam pa kung geh tai bơta chờ, gơboh gơbài”.

Ồng Ksor Jar, Phó Ƀí thư Ci ƀộ ƀòn Châm Prông, xã Ia Băng, kơnhoàl Đăk Đoa, càr Gia Lai đơs nền: Nam 2021 pa do, kòp Kovid-19 neh lơh tam gơl tơl gah rài kis bơh làng bol dê. Mờ kơnòl lơh krơh lài bơh đảng viên dê, ồng Ksor Jar sùm mblàng yal làng bol in git mờ pin dờn tàm gùng dà rơcang sơndră kòp bơh Đảng mờ dà lơgar he dê jat tơl tŭ tơngai: “Nam 2021 pa do, Đảng mờ dà lơgar he neh đơng lam kràñ cê, jơh nùs tàm broă đal git tiah geh kòp, kơryan kòp bơtờp. Tus nhai 9 nam 2021, làng bol tàm ƀòn bol hi geh cit 2 ding sơnơm vaccine, Đảng mờ dà lơgar tam gơl gơs gùng dà kis bal mờ kòp, gơ dờp ờdo ờdă, ngac ngar, gròi sền geh cồng nha kòp bơtờp. Bơta do dong bol hi ờ mìng geh ờdo ờdă rlau mờ gam gơtùi pơn jat tai bơtàu tơnguh lơh sa hìu bơnhă. Tŭ do, là đảng viên, añ sùm hòi jà làng bol lơh jat jơnau sồr 5K mờ pin dờn jat bơta đơng lam bơh Đảng mờ dà lơgar dê.”

Tàm broă bơ̆t bơtàu ƀòn lơgar pa, bồ tơngoh Đảng, nùs nhơm làng bol ngai sơlơ geh tơngŏ loh làng. Làng bol tàm ƀòn lơi kung rơcang lài nùs nhơm ai ù, tus bal ngai lơh broă nàng lơh gùng lòt, lơh hìu bơsram, lơh ală broă lơh geh kuơ ƀòn lơgar dê. Hơ̆ ờ mìng là broă lơh ngan, mờ tơlik loh nùs nhơm pin dờn mờ Đảng, gơnoar atbồ xã. Ồng Điểu Khuyên, Kwang atbồ ƀòn Bu Bir, xã Quảng Tín, kơnhoàl Dăk Rlấp, càr Dăk Nông yal bè bơta chờ tàm ƀòn lơgar pa: “Bơh tŭ geh gùng lòt, làng bol dan ưn ngài Đảng, gơnoar atbồ xã neh ai tơl bơta niam lơh gùng lòt rê ƀuơn niam. Bơh tŭ hơ̆, broă lòt rê tàm ƀòn mờ pơn diang phơng sih, phan geh lơh bơh broă lơh sa suơn sre làng bol dê bơh tàm suơn tàm sre kung ƀuơn sơl. Hơ̆ là kơnờm mờ broă geh broă lơh 135 lơh 400 thơ̆k gùng mờ làng bol tă tai lơh jơh gùng lòt tàm ƀòn jòng mờr 1 kơi sồ; geh 20 hìu tus bal mờ dà lơgar. Gùng do kung geh broă pơgồp bal bơh ală hìu ai ù, kơl tờm điều, tờm kơphe nàng lơh gùng pa ƀuơn niam tàm broă lòt lơh broă, làng bol kung git bơta kuơ bơh gùng do dê nàng tơnguh bơtàu lơh sa”.

Pin dờn tàm bơta đơng lam bồ bơh Đảng dê, rài kis tam gơl tàm ù tiah Tây Nguyên kung gam niam ngan, tài nùs nhơm kơp kờñ, bơta kơp kờñ brồ guh bơh tơl nă làng bol, tơl nă đảng viên dê.

Tàm càr Kon Tum, ală nam do, geh uă cau pas geh priă tơmàn là cau jơi bơtiàn kòn cau dùl êt nă cau bơh broă tam tờm chi sơnơm kuơmàng. A Chung, ơm tàm ƀòn Đăk Dơn, xã Măng Ri, kơnhoàl Tu Mơ Rông, càr Kon Tum là dùl pơn yơu. Mờ mờr 5 rbô tờm kơnuh sơnơm Ngọc Linh, khà priă tac bơh 120 tus 260 tơlak đông tàm dùl kĭ kơnuh ris geh bal mờ nha bè tŭ do, ồng A Chung neh gơ gơs cau pas geh priă tơmàn kơnòm tờm kơnuh sơnơm Ngọc Linh. Ồng pà git, ờ mìng hìu bơnhă ồng geh priă jền prap tềm pềr, tơl ngui tơl să, mờ rlau 100 hìu bơnhă làng bol tàm ƀòn Đăk Dơn ndrờm geh rài kis pas sơm lơm. Kis tàm tiah pôs đồng kac màng, geh rài kis hờm răm, gơboh gơbài, tàm bơta chờ hờp nam pa, A Chung ngoh rơngac đơs, Đảng neh cèng tus làng bol in ală sơnam pa hờm ram: “Kơnờm geh Đảng, dà lơgar sền gròi tus làng bol den tàng jơh ală làng bol tiah do tam tờm kơnuh sơnơm Ngọc Linh nàng bơtàu tơnguh lơh sa. Đảng, dà lơgar gam sền gròi, dong kờl làng bol geh ồs đèng sòl àng, gùng lòt rê ƀuơn ƀuài, uă hìu bơnhă neh lơh ngan brồ guh lơh pas, uă cau geh điện thoại ngac ngar pa, geh hìu den crăp wifi, blơi tivi ngac ngar nàng iat, sền ală jơnau yal tơnggit jơnau gơlik geh pah ngai tàm lơgar mờ dunia. Làng bol ƀòn Đăk Dơn chờ hờp pin dờn tàm bơta đơng lam bồ bơh Đảng dê. Nam pa, gơnoar atbồ sền gròi ngan, dong kờl ală hìu bơnhă, hìu bơnhă kal ke tàm xã Măng Ri do.”

Là dùl nă cau geh đảng, bi Đinh Văn Phới, kwang bàng lơh broă tàm phòng Zân tộk, kơnhoàl Đăk Pơ, càr Gia Lai gơlơh pơnyờ să ngan tŭ geh ntào tềng đăp bồng bi Đảng mờ đơs jơnau sơn tơm să tàm 4 nam lài. Mờ bi Đinh Văn Phới kung gơlơh gŏ să tờm pal geh kơnòl tàm broă pơgồp bal bơta pràn uă rơlao tai tàm ală broă lơh rài kis mpồl bơtiàn, broă lơh nùs nhơm dong kờl tus tàm tiah ngài. Kơnờm mờ broă dong kờl bơh Đảng mờ Dà lơgar, rài kis làng bol tàm ală ƀòn ngai sơlơ hờm ram, lơh sa gơguh, pơgồp bal tàm broă tơnguh bơtàu mpồl bơtiàn. Cau geh đảng Đinh Văn Phới yal: “Làng bol he kis tàm do lơh jăt niam gùng dà broă lơh bơh Đảng mờ Dà lơgar, lơh ngan lơh broă sa tơnguh bơtàu lơh sa hìu nhă. Là cau geh đảng gam kơnòm să, tơngai pa do añ kung neh, gam mờ pơn jăt tai lơh ngan lam sồr làng bol lơh jăt niam gùng dà broă lơh bơh Đảng, adăt boh lam bơh Dà lơgar, lam sồr làng bol lơh jăt niam broă rơcang sơndră mờ kòp Kovid-19 mờ làng bol neh lơh jăt niam”.

Lòt gan ală kal ke bơh nam 2021 dê tài bơh kòp Kovid-19 lơh gơbàn, bi Myet, cau tàm ƀòn Tiêng, xã Tân Sơn, ƀòn dờng Pleiku, càr Gia Lai neh rơcang mut tàm tơngai pa gơ dờp ờdo ờdă, ngac ngar mờ kòp nàng ờ mìng rơcang sơndră kòp bơtờp mờ gam bơtàu tơnguh lơh sa tai. Bi Myet đơs nền, tàm nam pa 2022, bi mờ làng bol tàm ƀòn geh lơh jat jơnau sồr bơh gah lơh sơnơm dê, nàng gàr niam pràn kơldăng să jan mờ bơtàu tơnguh lơh sa hìu bơnhă: “Bol hi sùm kơp kờñ hìu bơnhă bơtàu tơnguh rlau nàng cèng wơl bơta chờ hờp tàm rài kis. Nam 2021, gơlik geh kòp dờng Kovid-19 den tàng neh lơh ƀòn lơgar rơ ngòt ngan, gơtìp uă ngan kal ke. Kơp kờñ bơh tŭ do rê hờ tơnơ̆, bol he tam gơl pa rlau. Bol he pal lơh ngan lơh broă. Bal mờ gơp lơh jat jơnau đơng lam bơh kấp hơđăng dê, nàng bal mờ gơp kis niam rlau. Nting bơr nam pa làng bol he lơh sa bơtàu tơnguh, lơh broă geh cồng nha, git sền gàr ai să tờm in nàng nam pa do, kờp bơ tờp geh gơtùi kơryan, ƀòn lơgar gơ rê wơl mờ rài kis bè lài do.”

Dà lơgar Việt Nam tềng đap bơta đơng lam bơh Đảng dê, lơh gơs kac màng nhai 8 geh cồng nha, crơng gơs dà lơgar Việt Nam Dân củ kộng hòa, tơrgùm dùl dà lơgar mờ lơh geh uă jai pha tàm broă lơh tam gơl pa. Mờ git nđờ pha lin dờng màng hơ̆, Đảng he là sơnam pa bơh dà lơgar dê, bơh cau Việt Nam dê. Dùl sơnam pa tai neh tus, tơl nă cau Việt Nam tàm làm gùt ù tiah dà lơgar kah tai bè 92 nam ngai crơng gơs Đảng Kộng sản Việt Nam mờ Bác Hồ kờñ gơboh, tơl nă kwang bàng, đảng viên, tơl nă làng bol kơ̆ dơn pin dờn mut tàm nam pa 2022 mờ uă bơta kơp kờñ ngan.

Cau mblàng K'Duẩn mờ Ndong Brawl