Geh crơng gơs tàm ngai 06/12/1989, Mpồl cau ling yau Việt Nam là dùl mpồl cíñ trị- mpồl bơtiàn, ala mat ai bơta kơ̆p kờñ mờ gơnoar kwơ bơh cau ling yau dê, là cau tàm mpồl bơh Mặt trận Dà lơgar Việt Nam bơh Đảng dê đơng lam bồ. Bơh tŭ crơng gơs tus tŭ do, Mpồl neh sùm dờng pràn, lơh broă uă ngan, di gùng pơlam mờ geh cồng nha. Pơrjum dờng geh bơyai lơh ngai lồi nam 2022 neh tơrgùm tơn jơh, sền sơ wì cồng nha lơh jat Nghị quyết Pơrjum dờng cau ala mat gùt lơgar Mpồl cau ling yau Việt Nam dơ̆ 6, jat tàm bơnàng jă sơñio loh bơta pràn, bơta ờ hềt pràn, jơnau gơbàn mờ jơnau bơsram mờng chài; sền gĭt gùng dà broă lơh, jơnau kờñ, kơnòl broă, broă lơh tàm tơngai lơh broă dơ̆ 7, tơngai lơh broă bơh nam 2022-2027. Pơrjum dờng là broă lơh cíñ trị kwơ màng tàm rài kis cíñ trị- mpồl bơtiàn bơh cau ling yau, cau ling yau geh griăt mờ làng bol gùt lơgar dê, bơh hơ̆ pơn jat đơs nền gơnoar, gơnoar broă mờ ală bơta tă pơgồp dờng màng bơh Mpồl cau ling yau Việt Nam dê tàm broă lơh bơt bơtàu mờ sền gàr Dà lơgar.

Đơs tàm dơ̆ pơrjum dờng, Tổng Ƀí thư ồng Nguyễn Phú Trọng đơs nền, tơnơ̆ tŭ lơh sir kơnòl broă tàm ală mpồl ling phàu crong, gĭt nđờ tơlak nă kwang bàng, cau ling neh lik ling rê wơl mờ ƀòn lơgar tờm halà ntrờn gah lơh broă tus lơh broă tàm ală anih lơh broă tàm tơl anih lơh broă tàm tơl gah dê. Cau ling yau là ală cau neh lòt gan tŭ tơngai tam lơh, pơlam tàp mờ dờng pràn tàm ală bơta kal ke bơh ală dơ̆ tam lơh dê, neh geh ală tă pơgồp dà kơl hề dờng màng ai broă lơh tam lơh dongklàs jơi bơtiàn, bơt bơtàu mờ sền gàr Dà lơgar, tŭ do gam là dùl bơnah kwơ màng ngan bơh mpồl bơtiàn dê. Jờng rơ ală cồng nha lơh broă mờ cồng nha lơh geh mờ Mpồl cau ling yau Việt Nam neh lơh geh tàm tơngai pa do là dờng màng ngan, pơgồp bơnah nàng “Dà lơgar he ờ hềt tŭ lơi geh phan bơna, bơta pràn, gơnoar broă mờ bơngă pin dờn tàm dunia bè tŭ do”, Tổng Ƀí thư ồng Nguyễn Phú Trọng đơs loh, Đảng mờ Dà lơgar jờng rơ uă ngan broă lơh mờ ală bơta tă pơgồp bơh Mpồl cau ling yau Việt Nam dê gơwèt mờ broă lơh bơt bơtàu sền gàr Dà lơgar, ală cau ling yau di pal là anih kơldìng pin dờn ngan bơh kấp ủy, gơnoar atbồ mờ làng bol dê.

Đơs loh, ală nam tus, kờp dŭ lài ală bơta tàm dunia pơn jat tai gam geh ală bơta gơlik geh kal ke, ờ gơtùi gĭt lài, tàm lơgar, bol he kung gơtìp ờ dùl ết ală bơta kal ke, bơta lòng, Tổng Ƀí thư ồng Nguyễn Phú Trọng pà gĭt, gơwèt mờ Mpồl cau ling yau, Pơrjum dờng dơ̆ 13 bơh Đảng dê kung neh sơñio loh kơnòl broă: “Pơndờm pơnđiang cau ling yau đòm jat niam nùs nhơm, bơhiàn “Cau ling Wa Hồ” dê tàm broă bơt bơtàu mờ sền gàr Đảng, Dà lơgar, làng bol mờ rài xã hội củ nghĩa, sền gàr bơnàng jă ƀồ tơngoh bơh Đảng, sơndră wơl mờ ală nùs nhơm kơlôi sơnơng tìs, tàm gơ jrañ kơ uềng; dong kờl bal mờ gơ̆p lơh broă sa, tam gơl pa rài kis. Sơlơ lơh geh gơnoar broă bơh cau tàm mpồl dê tàm broă bơto bơtê nùs nhơm kờñ gơboh dà lơgar, bơhiàn kăc màng ai rơnàng kơnòm să in, pơgồp bơnah bơt bơtàu mờ bơt bơtàu pràn kơldang mpồl lơh broă cíñ trị tàm ƀòn lơgar, bơt bơtàu Đảng mờ ală anih lơh broă cíñ trị sàng goh, kơ̆ kơljap, pràn kơl dang”, jat tàm nùs nhơm do.

 Tổng Ƀí thư ồng Nguyễn Phú Trọng sồr: Mpồl cau ling yau Việt Nam tàm ală kấp kờñ pal lơh niam rlau tai gơnoar broă là cau tờm cíñ trị, geh gơnoar kwơ màng ngan tàm broă rơndap broă lơh, hòi jà làng bol lơh jat gùng dà broă lơh bơh Đảng, adat boh lam bơh Dà lơgar dê, sơlơ tơnguh tam klăc bal dờng jơh gùt jơi bơtiàn, lơh jat niam gơnoar lơh tờm bơh làng bol dê, tơrgùm tơl bơta pràn bơtàu tơnguh lơh sa- mpồl bơtiàn, lam lơh niam rài kis mpồl bơtiàn tiah làng bol ơm kis, lơh pràn ală srơh tàm pơrlòng kờñ gơboh dà lơgar, lơh jat broă làng bol lơh tờm, bơt bơtàu bơta dùl nùs bal mpồl bơtiàn nàng pơgồp bơnah lơh jat geh cồng nha ală jơnau kờñ, kơnòl broă cíñ trị bơh Dà lơgar dê tàm tơngai pa. Đảng đơng lam bồ, Dà lơgar atbồ, làng bol lơh tờm pal là 3 nơm jơng tàm tơƀă kơ̆ kơljap bơh broă lơh bơt bơtàu mờ sền gàr Dà lơgar he dê.

 Tổng Ƀí thư ồng Nguyễn Phú Trọng sồr, Mpồl cau ling yau ală kấp kràñ cê jơh nùs sền gàr ală cồng nha kăc màng, sơlơ tơnguh lơh broă bơto bơtê cíñ trị, bồ tơngoh, dong kwang bàng, cau tàm mpồl in gĭt loh gùng dà broă lơh bơh Đảng, adat boh lam bơh Dà lơgar dê; sùm tơrgùm wơl, yal mờ ală kấp ủy, gơnoar atbồ jơnau đơs tă pơgồp bơh cau ling yau, bơh làng bol dê bè ală gùng dà bơtàu tơnguh lơh sa- mpồl bơtiàn, pal sền gàr dà lơgar- sền gàr lơngap lơngai.

Tổng Ƀí thư ồng Nguyễn Phú Trọng đơs: Mpồl cau ling yau ală kấp pal ngui niam ngan rlau jơh jơh ală bơta pràn mờ broă lơh dong kờl bơh Dà lơgar dê gơwèt mờ cau ling yau; pơgồp bal tàm bơrlŭ bal ală broă lơh, ală dơ̆ hòi jà tàm mpồl cau ling yau dùl bă geh cồng nha; lơh pràn mờ tơnguh uă bơta niam tàm srơh “Cau ling yau dong bal mờ gơ̆p tơrmù rƀah, lơh sa jak”. Sền gròi rlau tai tus ală tiah kal ke, tiah sar lơgar ngài, pôs đồng kăc màng; pơn jờng, pơndờm pơnđiang ală mpồl cau, cau dùl nă să is, cau ling yau lơh ngan tus bal lơh sa kă bro, brồ guh lơh pas di mờ adat boh lam; đòm jat niam bơhiàn “Hùc dà kah tô dà” ai broă lơh kis gĭt jơnau gĭt adat, dùl bơta niam bơnĕ “Cau ling Wa Hồ” bơh cau ling yau Việt Nam dê.

 Tổng Ƀí thư ồng Nguyễn Phú Trọng kung sồr, sền gròi broă bơt bơtàu Mpồl cau ling yau Việt Nam sàng goh, kơ̆ kơljap, pràn kơldang jơh bal bè cíñ trị, bồ tơngoh mờ broă rơndap lơh; tam gơl pa pràn kơl dang broă lơh mờ tơngume lơh broă nàng Mpồl cau ling yau Việt Nam in lơh jat niam gơnoar broă, kơnòl broă bơh he dê, pal di pal mờ cau, wèt rê uă tàm ƀòn lơgar, sền dờng màng bơta niam mờ cồng nha; bañ lơh pơn hừ să, lơh gời mờ pal lơh ngan tus bal bơt bơtàu Đảng, bơt bơtàu Dà lơgar mờ ală anih lơh broă cíñ trị ngai sơlơ sàng goh, kơ̆ kơljap, pràn kơl dang, tam klăc đềt mềr, rềp mềl mờ làng bol, lơh kơ̆ kơljap bơta pin dờn bơh làng bol dê gơwèt mờ Đảng mờ Dà lơgar.