VOV4.K’ho- Mho ngai 12/4, Đảng đoàn Quôk hội lơh broă mờ Mpồl đơng lam dà lơgar tơn jơh Nghị quyết sồ 19 khóa 11 bè pơn jat tai tam gơl pa broă lơh, adat boh lam bè ù tiah tàm tơngai chồl pràn tơl làm broă lơh tam gơl pa, lơh gơlik bơnàng jă nàng tus nam 2020 lơgar he gơ gơs là lơgar lơh sa mờ măi mok jat gùng dà tam gơl pa. Đơs tàm pơrjum, Củ tịc Quôk hội ồng Vương Đình Huệ đơs loh, jơnau kờñ bơh broă tơn jơh Nghị quyết sồ 19 mờ tam gơl Adat Ù tiah dê là nàng kờñ atbồ, ngui ù tiah geh cồng nha rlau, lơh gơlik bơta pràn chul chồl bơta bơtàu tơnguh kơ̆ kơljap jŏ jòng sùm bơh dà lơgar dê, mờ kung tơrmù bà bơta lah yă kal ke gơ rềng tus ù tiah.

Pơrjum neh tơrgùm cribơyai, lơh loh ală bơta pa bơh jơnau yal tơn jơh mờ jơnau rơcang cih Nghị quyết pa dê pơndrờm mờ Nghị quyết sồ 19 jat bơnàng jă cíñ trị mờ Kơrnuat bơt bơtàu dà lơgar tàm tơngai brồ guh tus Củ nghĩa xã hội (bơ tơl, bơtàu tơnguh nam 2011), Sơnua boh lam nam 2013, cơng tàng khoa họk, cơng tàng ngan ngồn bơh ală jơnau sồr ai tơlik dê, mờ kung lơh loh jơnau sền sơ wì bơta gơ rềng bơh ală jơnau sồr ai tơlik dê gơ wèt tus mờ broă atbồ, ngui geh cồng nha ù tiah.

Cau mblàng K’Duẩn