VOV4.K’ho - Ngai òr (05/08), tàm ƀòn dờng Dà Làc, càr Lâm Đồng, Mpồl cau lơh ƀăo Việt Nam bơyai lơh pơrjum tơn jơh broă dong kờl ală jơnau cih sră ƀăo geh bơta niam uă tơngai bơh nam 2016 tus 2020, lơh jăt broă dong kờl tơngai bơh nam 2021 tus 2025.

                            Pơn jăt tai tơnguh broă dong kờl jơnau cih sră ƀăo geh bơta niam uă

Geh mờr 150 nă kwang bàng là cau tàm mpồl, kwang đơng lam ală mpồl lơh ƀăo bơh 19 càr, ƀòn dờng tàm tiah tàm gùl lơgar mờ Tây Nguyên tus bal. Nàng pơn jăt tai lơh jăt geh cồng nha broă dong kờl jơnau cih sră ƀăo geh bơta niam uă tơngai bơh nam 2021 tus 2025 di jăt mờ kơrnoăt sồ 558 bơh Thủ tướng Cíñ phủ, pơrjum neh ai uă tơngai pơgồp jơnau đơs, mblàng mờ đơs uă jơnau bè broă geh ai tơngu me lam sồr mờ broă di pal mờ tiah lơh broă; dong kờl tàm broă tơnguh bơta chài lơh broă, tơnguh broă lơh ai ală cau lơh ƀăo in tàm broă lơh; tơnguh bơta niam jơnau cih bơh ală anih lơh broă sră ƀăo. Đơs tàm pơrjum, ồng Nguyễn Đức Lợi, Phó Củ tịc Thường trựk Mpồl cau lơh ƀăo Việt Nam đơs, broă pơn jăt tai chồl pràn broă dong kờl sră ƀăo mờ khà priă uă rơlao, tàm hơ̆ tơrgùm tơnguh uă bơta ngăc ngar tàm lơh broă, broă lơh bơh ală cau tàm mpồl in.

Cau mblàng Ndong Brawl