Tàm khà do, geh 3 nă cau gơtìp sồt să kơn jơ̆ neh geh reh tàm Hìu sơnơm dờng càr Kon Tum, pơndiang ntrờn rê hờ ƀòn dờng Hồ Chí minh mờ pơn jat tai geh tơmut tàm hìu sơnơm nàng sơm. Broă pơndiang ntrờn ală cau sồt să geh lơh jat bơta kơp kờñ bơh hìu bơnhă mờ kwang đơng lam bồ Kụk atbồ drà kă bro ƀòn dờng Hồ Chí Minh dê.

Lài hơ̆, mho ngai 13/4, rơndeh nac pơndiang mpồl lòt sền bơh Kụk atbồ drà kă bro ƀòn dờng Hồ Chí Minh geh 21 nă cau tŭ lòt tàm gùng rơndeh 24 tus gơl lòt gan thôn Đăk Puih, xã Đăk Rờ Te, kơnhoàl Kon Rẫy, càr Kon Tum den gơtìp rềs àr. Dơ̆ rềs àr lơh ồng Nguyễn Thành Triệu chơt tơn mờ 24 nă cau, tàm hơ̆ geh 20 nă cau bơh mpồl lòt sền, 2 nă cau măi rơndeh kong goa mờ rơndeh nac, 1 nă cau tờm bơh cau măi rơndeh kong goa mờ 1 nă cau pơlam lòt nhơl gơtìp sồt să.