3 nhai bồ nam,  kờp jơh priă phan bơna tàm ù tiah càr Dăk Lăk dê kờp dŭ lơh geh rlau 12 rơbô 300 tơmàn đong, gơguh 3,5% pơndrờm dùl tŭ bal mờ nam lài, lùp dồs priă dia rlau 2 rơbô 390 tơmàn đong, mờ 34,2% kờp dŭ lài Dà lơgar dê jàu, ală bơta phan tăc phan mờ lơgar ndai tờm ngan gơguh niam, priă lơh geh tăc phan mờ lơgar ndai lơh geh mờr 500 tơlak dolar Mỹ, gơguh rlau 29% pơndrờm dùl tŭ bal mờ nam lài.

Đơs tàm pơrjum, Ƀí thư Tỉñ ủy ồng Nguyễn Đình Trung pà gĭt, lơh sa mpồl bơtiàn bơh càr dê geh ală tềl tơngŏ gơguh niam, mơya kung gam uă broă jàu ờ hềt lơh geh jat broă rơndăp lơh geh ai. Tàm tơngai tus, càr pal sền gĭt kơnòl broă tờm, lơh di broă, di anih, broă lơh bơtàu tơnguh mhar geh bơta gơtùi lơh jat, pơgồp bal mờ hòi jà ngui geh cồng nha ală priă jền. Mơkung tơngkah broă lơh di pal mờ bơta geh ngan, ală bơta bơh càr dê, mpồl lơh broă nàng đơng lam sồr lơh jat geh cồng nha jơnau kờñ kơnòl broă nam 2024.