Drim ngai 9/08, tàm ƀòn dờng Nha Trang, càr Khánh Hòa, Anih jơnau đơs Việt Nam, Ƀan Tuyên giáo Dà lơgar, Tổng kụk Cíñ trị Ling klàng làng bol Việt Nam- Bộ Quốk phòng mờ Ủy ƀan Ñân zân càr Khánh Hòa bơyai lơh Broă lơh pơrjum ƀăo, yal bè Broă lơh mblàng yal tờm đơs crih tam ya “Pràn pas bơh dà lềng ƀòn lơgar”. Do là broă lơh mblàng yal tờm geh lơh dờng kấp dà lơgar nàng kờñ lơh duh hồl rlau tai nùs nhơm pơn yờ să, bơta sền dờng màng jơi bơtiàn, nùs nhơm bồ tơngoh jơh nùs lơh ngan sền gàr gơnoar tờm dà lềng, bồt bơlào Dà lơgar mờ nàng kờñ sền wơl cồng nha lơh jăt Nghị quyết Pơrjum dờng dơ̆ XIII bơh Đảng dê tàm ală tiah dà lềng, bồt bơlào bơh bồ tơngai lơh broă tus tŭ do. Broă lơh geh bơyai lơh tàm tŭ 8 jiơ mang ngai 12/08 do, tàm hơ̆ geh 3 bơta ngoh rơngăc tờm ngan mờ ală tơngume “Nùs nhơm kah rơngal dà lềng”, “Việt Nam wèt tus pas bơh dà lềng”, “Việt Nam wèt tus pràn bè dà lềng”.

Tàm dơ̆ pơrjum ƀăo, ồng Phạm Mạnh Hùng, Phó Kwang atbồ dờng Anih jơnau đơs Việt Nam, Phó Kwang atbồ Mpồl đơng lam, Kwang atbồ Mpồl rơndăp broă lơh mblàng yal tờm đơs crih tam ya “Pràn pas bơh dà lềng ƀòn lơgar”; đơs nền Việt Nam là lơgar dà lềng mờ bơta kơ̆p kờñ jơh rài lơh broă tàm dà lềng, pas gơs bơh dà lềng mờ sền gàr ring lơngai tàm dà lềng, nàng kờñ lơh duh hồl rlau tai nùs nhơm pơn yờ să, sền dờng màng jơi bơtiàn, nùs nhơm jơh nùs sền gàr gơnoar tờm dà lềng, bồt bơlào Dà lơgar dê, tơnguh uă nùs nhơm sền gàr mờ lơh jăt niam bơta ƀuơn, bơta pràn li la bơh dà lềng, bồt bơlào lơgar Việt Nam dê.