VOV4.K’ho - Mho ngai 30 nhai 3, tàm Hà Nội neh bơyai lơh Pơrjum bè broă pơgồp bal đah Củ tịc lơgar mờ Ủy ƀan Thường vụ Quốk hội. Pơrjum ring bal sền wơl broă lơh tàm tơngao pa do, tàm hơ̆ uă ngan là tơngai lơh broă Quốk hội khoă 13 mờ 14 bơh bơh sơnrờp tơngai lơh broă Quốk hội khoă 15 tus tŭ do, broă pơgồp bal đah Củ tịc lơgar mờ Quốk hội, Ủy ƀan Thường vụ Quốk hội sùm geh tơnguh, ngai sơlơ mŭt tàm mùl màl mờ geh cồng nha niam, tơl ală bơta tàm ală gah broă.

                                Củ tịc lơgar ồng Nguyễn Xuân Phúc geh jơnau đơs tàm pơrjum

Bè kơnòl tàm tơngai tus, Củ tịc lơgar ồng Nguyễn Xuân Phúc đơs wơl jơnau đơng lam kwơ màng bơh Tổng Ƀí thư ồng Nguyễn Phú Trọng dê tàm pơrjum sơn đờm bơh dơ̆ pơrjum sơnrờp, Quốk hội khoă 15; tàm hơ̆ geh sồr Quốk hội pal pơn jăt tai tơnguh bơta pràn kơl dang rơlao tai bè gơnoar, bơngă bơh Quốk hội dê tàm broă ai geh broă lơh adăt boh lam ai ală broă lơh bơh dà lơgar dê, drơng kơnòl tơnguh bơtàu lơh sa mpồl bơtiàn, gàr niam bơta lơngăp lơngai dà lơgar, lơh broă bal mờ lơgar ndai.

Cau mblàng Ndong Brawl