VOV4.K’ho - Mho òr (04/04), Pơrjum bè ờs nhai 3 bơh Cíñ phủ pơn jăt tai mờ broă bơ̆t bơtàu adăt boh lam. Cíñ phủ neh iăt, cri bơyai jơnau sồr bơ̆t bơtàu adăt atbồ, ngui priă dà lơgar bơcri tàm broă lơh sa kă bro tàm mpồl lơh sa kă bro (tam gơl); sồr bơ̆t bơtàu adăt boh lam tơnguh bơtàu lơh sa mờ măi mŏk; rơndăp broă adăt kham kòp, sơm kòp; jơnau yal bè kơrnoăt ai geh khà bă ù, ngui ù jăt tơl tơngai gơwèt mờ ală tiah lơh sa mờ măi mŏk geh bă ù rơlao 500 lồ tàm rơndăp cih Nghị định bè atbồ tiah lơh sa mờ măi mŏk mờ tiah lơh sa.

Cri bơyai bè tơngu me bơ̆t bơtàu adăt boh lam, ală kwang bàng tàm Cíñ phủ neh lơh loh tai broă pal geh ală rơndăp broă, sồr bơ̆t bơtàu adăt do; ală bơta kòl, ờ di pal geh bơsong; di pal, lơh ndrờm bal đah ală adăt... tàm nùs nhơm tơlik adăt ờ mìng nàng atbồ mờ gam lơh geh adăt boh lam nàng drơng, chồl pràn broă tơnguh bơtàu. Jơnau đơs pơn dŭt bè tơngu me bơ̆t bơtàu adăt boh lam, Thủ tướng Cíñ phủ ring bal bè tơngu me ală rơndăp broă adăt mờ jơnau cri bơyai bơh ală kwang bàng tàm Cíñ phủ. Thủ tướng jào ală ƀộ, anih lơh broă gơrềng bal đơng lam, pơgồp bal iăt, lơh gơs nàng yal mờ Quốk hội in sền.

Cau mblàng Ndong Brawl