Jăt mờ hơ̆, bơh ngai 20 tus 23/09/2023 tàm ƀòn dờng Đà Nẵng geh lơh Pơrjum Ƀộ trưởng Ƀộ Yal tơngĭt jơnau Asean dơ̆ 16 (hòi lơyah là 16th AMRI), Pơrjum Ƀộ trưởng Ƀộ Yal tơngĭt jơnau Asean mờ 3 dơ̆ 07 (hòi lơyah là 7th AMRI+3) mờ ală Pơrjum Kwang bàng Kâp dờng gơrềng bal. Pơgăp 60 nă cau lơh ƀăo tàm lơgar tus bal dơ̆ pơrjum ƀăo.

Đơng lam dơ̆ pơrjum ƀăo, ồng Nguyễn Thanh Lâm, Thứ trưởng Ƀộ Yal tơngĭt jơnau mờ Mblàng yal jơnau pà gĭt, tơngume sùm sùm bơh ală dơ̆ Pơrjum dê là “Mblàng yal jơnau: Bơh yal tơngĭt jơnau tus Bơta gĭt wă tài dùl Asean Pơđơl pràn is mờ Gơrờm bal”. Do là tơngume geh lơgar Việt Nam săc rwah sùm sùm tàm jơh ală tơngume cribơyai bơh ală pơrjum dê mờ broă lơh đah bơdìh geh lơh tàm dơ̆ do. Tơngume đơs uă gơnoar broă, kơnòl broă bơh gah broă lơh mblàng yal jơnau dê tàm tơngai pa, ai yal tơngĭt jơnau gơ gơs là bơta gơn kơnờm bơtàu tơnguh, ờ mìng yal tơngĭt jơnau mờ gam ai tơl bơta tam gơl bơh yal tơngĭt jơnau gơ gơs bơta gĭt wă, bơ̆t bơtàu dùl Asean pơđơl pràn is, lơh kơ̆ kơl jăp wơl bơta pràn jak tàm dơlam is, jơnau tơl pràn kong jai mờ gơrờm bal nàng đơs nền gơnoar broă, bơngă pin dờn bơh Asean dê ờ mìng wèt tus tàm dơlam mpồl lơm mờ gam rơcăng lài tam dră wơl mờ ală bơta gơ tam gơl tềng đăp bơta gơlik geh tàm dunia tŭ do.