Jat jơnau đơs tàm pơrjum, bơta niam bơto bơtê pe kấp tàm Tây Nguyên gam hời rơ hời  bal mờ bơta kờp bal bơh gùt lơgar dê. Mpồl cau pơgru mờ kwang bàng atbồ bơto bơtê geh sền gròi bơcri priă lơh, bơtàu tơnguh jơh bal bè khà mờ bơta niam, hời rơ hời lơh geh jơnau sồr tam gơl pa bơto bơtê. Mơya, jat ală kwang bàng, ală bơta tam gơl bơh gah bơto bơtê tàm tiah Tây Nguyên dê sền bal gam lơyài, ờ hềt lơh geh jơnau kờñ bơtàu tơnguh lơh sa- mpồl bơtiàn; bơta niam mpồl cau lơh broă ờ hềt uă mờ kung gam uă ngan bơta lòng.

Đơs pơndŭt tàm dơ̆ pơrjum, ồng Nguyễn Kim Sơn, Ƀộ trưởng Ƀộ Giáo dục- Đào tạo sồr tàm tơngai tus, ală càr tàm tiah Tây Nguyên pơn jat tai; bơto bơtê, tơnguh uă bơta jak chài ai mpồl cau pơgru in; rơndap broă lơh hìu bơsram, ơdŭ bơsram di pal rlau; hòi jà bơta tă pơgồp bal  mpồl bơtiàn lơh bal ai gah bơto bơtê in, tơnguh uă bơta niam, ngui geh cồng nha mpồl cau, ngan là mpồl cau pơgru làng bol kòn cau dùl ết nă cau tàm ală tiah, pơgồp bal mờ jơnau kờñ bơtàu tơnguh lơh sa- mpồl bơtiàn.