VOV4.K’ho- Ngai 08/4, tàm ƀòn dờng Pleiku, Ƀộ Nông nghiệp mờ Phát triển Nông thôn pơgồp bal mờ Ủy ƀan Ñân zân càr Gia Lai bơyai lơh pơrjum Bơta geh ngan mờ gùng dà bơtàu tơnguh bùm blàng tàm Việt Nam.

                 Pơrjum bơta geh ngan mờ gùng dà bơtàu tơnguh bùm blàng tàm Việt Nam

Tŭ do, lơgar he geh rlau 528 rbô lồ bùm blàng, tam uă ngan tàm tiah kơh bơnơm đah tô dà lơgar, đah tô tàm gùl lơgar, tiah kềng gah dà lềng đah jum tàm gùl lơgar, Tây Nguyên mờ tiah đah jum mat tơngai lik dà lơgar. Nam 2021, khà bùm blàng gùt lơgar lơh geh mờr 10 tơlak 700 rbô tấn, tàm hơ̆ geh 2 tơlak 900 rbô tấn geh tac hờ lơgar ndai, priă lơh geh mờr 1 tơmàn 200 tơlak dolar Mỹ. Tàm pơrjum, Thứ trưởng Ƀộ Nông nghiệp mờ Phát triển Nông thôn ồng Lê Quốc Doanh pà git, tơngai tus, ală mpồl lơh broă bơh Ƀộ Nông nghiệp mờ Phát triển Nông thôn dê geh sơlơ kơlôi sơnơng ală sơntìl pa ai cồng nha tơnhàu uă, geh bơta niam uă, jai sơndră kòp. Thứ trưởng sồr ală tiah mờ mpồl lơh sa kă bro sơlơ lam lơh tam bùm blàng jat gùng dà tơrmù priă tă lơh, tơnguh cồng nha lơh geh, tơnguh bơta niam phan lơh gơs; tam gơl pa kông nghệ, chồl pràn lơh gơlik uă, sền gàr tiah ơm kis mờ lơh bal lơh sa kơ̆ kơljap.

Cau mblàng K’Duẩn