VOV4.K’ho - Lơgar Việt Nam kơ̆p kờñ geh tam pà nùs nhơm kơlôi sơnơng bal mờ broă mờng chài dunia tàm broă brồ guh wơl lơh sa mpồl bơtiàn tơlir, kơl jăp mờ tơrgùm bal, chồl pràn cồng nha broă brồ guh wơl mờ tơnguh bơtàu lơh sa mpồl bơtiàn tơnơ̆ mờ kòp Kovid-19.

Do là jơnau đơs tờm bơh Phó Thủ tướng Thường trựk Cíñ phủ ồng Phạm Bình Minh tàm pơrjum dunia “Chồl pràn broă brồ guh wơl lơh sa Tơlir mờ Tơrgùm bal: Jơnau bơsram bơh broă mờng chài dunia” geh broă Tơnguh bơtàu Liên Hợp Quốc (UNDP) mờ Ƀộ Ngoại giao pơgồp bal bơyai lơh, sơn đờm drim òr (25.02) tàm Hà Nội jăt broă lơh pơrjum tơn mờ pơrjum pờ tàm internet. Đơs tàm dơ̆ sơn đờm pơrjum, Phó Thủ tướng Thường Trựk Cíñ phủ ồng Phạm Bình Minh đơs: Bơh broă mờng chài tàm broă tam gơl pa, pờ mpồng mờ tơrgùm bal tàm rơlao 35 nam do, tơl dơ̆ ala, tam gơl lơgar Việt Nam ndrờm geh sơn đờm bơh broă tam gơl bồ tơngoh, jơnau git wă, wèt tus ală bơta kwơ tơnguh bơtàu jŏ jòng, tơrgùm bal dà lơgar dê, làng bol dê. Mờ pơrjum ngai do là dơ̆ niam nàng lơgar Việt Nam iăt ală jơnau tam pà bal bơh ală cau jăk chài, ală mpồl lơh broă dunia, ală cau lơh broă kơlôi sơnơng tàm lơgar mờ lơgar bơdìh, bè nùs nhơm kơlôi sơnơng mờ broă mờng chài dunia tàm broă brồ guh wơl lơh sa mpồl bơtiàn tơlir, kơl jăp mờ tơrgùm bal.

Cau mblàng Ndong Brawl