VOV4.K’ho - Drim òr (07/06), tàm ƀòn dờng Buôn Ma Thuột, càr Dăk Lăk, Mpồl cau ling yau Việt Nam bơyai lơh pơrjum cri bơyai Mpồl cau ling yau tus bal sền gàr tiah kis, mờ broă tus bal bơh ala măt ală cau ling yau 14 càr, ƀòn dờng tàm tiah tàm gùl lơgar mờ Tây Nguyên.

             Pơrjum cri bơyai cau ling yau tus bal sền gàr tiah kis tàm tiah tàm gùl lơgar mờ Tây Nguyên

Jăt mpồl cau ling yau Việt Nam yal, bơh nam 2006, Mpồl mờ Ƀộ Tài nguyên Môi trường neh kĭ hơ bal ală broă lơh pơgồp bal lơh bè sền gàr tiah kis mờ atbồ ngui ù tiah. Tus tŭ do, ală kấp mpồl neh lơh geh 1 rơbô 650 broă lơh mpồl cau ling yau tus bal sền gàr tiah kis. Ală mpồl geh ală broă lơh tơn tàm broă tus bal sền gàr tiah kis, lơh jăt ală broă lơh drơng ala tiah kis, mờ lam sồr bè broă do. Uă mpồl cau lam sồr sền gàr tiah kis kấp xã neh geh mpồl cau ling yau crơng gơs mờ lơh broă geh cồng nha. Tàm pơrjum cri bơyai, ală cau ala măt tus bal cri bơyai, tam pà bal ală tơngu me tàm broă cau ling yau tus bal sền gàr tiah kis, broă mờng chài tàm broă lam sồr làng bol; tơnguh uă jơnau git wă, bơta pràn ai cau tàm mpồl cau ling yau in tơnguh gơnoar tờm tàm broă sền gàr tiah kis.

Cau mblàng Ndong Brawl