VOV4.K’ho - Drim òr (23/06), tàm ƀòn dờng Hồ Chí Minh, Mpồl bơyai broă Dà lơgar pơgồp bal mờ Mpồl duh broă lý luận Dà lơgar bal mờ Thàñ ủy Hồ Chí Minh bơyai lơh pơrjum cri bơyai khoa họk dà lơgar “Tam gơl pa broă đơng lam bơh Đảng gơwèt mờ broă lơh bơh mpồl lơh broă cíñ trị - ală broă lý luận mờ mùl màl” tàm tiah đah jum dà lơgar.

Đơs tàm dơ̆ chờ gờm cri bơyai, Ƀí thư Thàñ ủy Hồ Chí Minh ồng Nguyễn Văn Nên pà git, bơh pơrjum cri bơyai, ƀòn dờng Hồ Chí Minh geh iăt uă jơnau bơsram niam bơh ală cau jăk chài, cau khoa họk, bơh ală càr, ƀòn dờng ndai nàng ngui tàm mùl màl. Ală jơnau đơs tàm pơrjum cri bơyai tơrgùm tàm broă sền wơl 15 nam lơh jăt Nghị quyết sồ 15, mùl màl tàm ală tiah, jơnau dan ai geh ală broă lơh geh bơta pràn, dong kờl Mpồl đơng lam geh tơngu me kơl jăp tŭ ai geh ală tơngu me tàm rơndăp broă yal mờ Ƀan cấp hàñ Dà lơgar tàm nhai 10 nam 2022, nàng Dà lơgar in sền, ai tơlik Nghị quyết bè broă pơn jăt tai tam gơl pa broă đơng lam, at gơnoar bơh Đảng gơwèt mờ mpồl lơh broă cíñ trị tàm bơta pa.

Cau mblàng Ndong Brawl