VOV4.K’ho - Di tơnkah 110 nam ngai deh ƀồc ồng Nguyễn Văn Cừ, (09/07/1912-09/07/2022), mho òr (08/07), tàm càr Bắc Ninh, Họk viện Cíñ trị Dà lơgar Hồ Chí Minh pơgồp bal mờ Ƀan Tuyên giáo Dà lơgar bal mờ Tỉñ ủy Bắc Ninh bơyai lơh Pơrjum cri bơyai Khoa họk “Tổng Ƀí thư Nguyễn Văn Cừ-Kwang đơng lam jăk chài Đảng dê bal mờ kăc màng Việt Nam, cau kòn jăk chài càr Bắc Ninh dê”.

Ƀồc ồng Nguyễn Văn Cừ kis tàm dùl hìu nhă bơsram sră rơƀah, geh bơhiàn pơrlòng geh cồng nha tàm xã Phù Khê, kơnhoàl Từ Sơn, càr Bắc Ninh, tŭ do gơwèt thị xã Từ Sơn, càr Bắc Ninh. Jơh rài kis lơh broă kăc màng bơh ƀồc ồng Nguyễn Văn Cừ dê là cau lam lài bè nùs nhơm jăk chài bơh cau Kộng sản, gơs Tổng Ƀí thư tàm nhai 3 nam 1938. Mờ 29 sơnam, rơlao 13 nam tus bal lơh broă kăc màng, 7 nam gơtìp kŭp jàm tàm hìu jàm ling sò tơm, rơlao 2 nam lơh Tổng Ƀí thư Đảng, Tổng Ƀí thư ƀồc ồng Nguyễn Văn Cừ neh geh ală broă lơh dờng màng tus mờ rài kăc màng bơh Đảng mờ Dà lơgar he dê.

Cau mblàng Ndong Brawl