Đơs sơnđờm mut pơrjum, Củ tịc Quôk hội ồng Vương Đình Huệ pà gĭt, tàm pơrjum dơ̆ 5, Quôk hội rơ̆p lơh mpồl broă lơh dờng ngan jơh bal bè broă lơh bơt bơtàu adat boh lam, jat sền mờ lơh nền ală broă dờng màng. Ală tơngume tă pơgồp jơnau đơs ndrờm là ală broă kal ke, kal ke ngan, ngan là ală broă geh gơrềng tus ù tiah, tàm pơrlòng giă, hìu ơm... Den tàng, jat Củ tịc Quôk hội, pơrjum do nàng kờñ bơsong nền nòn ală broă gam geh jơnau đơs krơi is mờ kờñ pal geh, pal geh bơta ring bal đah anih lơh broă yal mờ sền sơ wì.

Tơngkah bàr pe tơngume lơyài pơyoa tus mờ anih lơh broă sền sơ wì mờ Ủy ƀan Thường vụ Quôk hội neh gơrềng tus broă lơh ală broă lơh pơn jat tai; bàr pe tơngume dờng màng yal mờ Quôk hội in tus tŭ do ală Ƀộ kung ờ hềt ring bal nùs nhơm, Củ tịc Quôk hội sồr, mờ ală broă dờng, kal ke, gam geh jơnau đơs krơi is den anih lơh broă yal mờ ală Ƀộ, ngàñ pal cribơyai nền cê, ring bal geh bal mờ gơ̆p den hơ̆ sồng geh bơta ring bal bơh Quôk hội. Thủ tướng Cíñ phủ sồr Quôk hội, Ủy ƀan Thường vụ Quôk hội sền gròi tus broă lơh tam pà kấp, tam pà gơnoar nàng bơsong bơta gơkòl tàm broă lơh jat broă lơh. Bè đah Cíñ phủ, tàm tơngai tus, Cíñ phủ rơ̆p pơnđơl pràn lơh ngan lơh tam pà kấp, tam pà gơnoar pơgồp bal mờ sơlơ tơnguh kơnòl broă.