VOV4.K’ho- Ngai 22/04, tàm hìu lơh broă Cíñ phủ, Phó Thủ tướng thường trực Cíñ phủ ồng Phạm Bình Minh neh wă Thứ trưởng Ngoại giao Hìu yàng bàp Vatican, lơgar Đức ồng Miroslaw Wachowski di dơ̆ tus Việt Nam tus bal mờ đơng lam bal pơrjum dơ̆ 9 Mpồl lơh broă tàm bơrlŭ bal Việt Nam mờ Hìu yàng bàp Vatican. 

Phó Thủ tướng thường trực ồng  Phạm Bình Minh tơngŏ bơta chờ hờp tềng đap ală bơta bơtàu tơnguh ngan bơh gĭt gơ̆p Việt Nam mờ Vatican dê. Thứ trưởng ồng Miroslaw Wachowski ưn ngài bơta wă rò bơh cíñ phủ Việt Nam dê mờ đơs ngan Bàp yàng Francis mờ Hìu yang bàp sùm kơ̆p kờñ gĭt gơ̆p Việt Nam mờ Hìu yàng bàp Vatican dê ngai sơ lơ bơtàu tơnguh, lơh geh tơl bơta nàng mpồl cau jat yàng bàp Việt Nam dê tă pơgồp uă ngan ai bơta bơtàu tơnguh dà lơgar dê. Thứ trưởng kung ring bal ală broă lơh dong tơnguh gĭt gơ̆p đah 2 gah tàm tơngai tus, ngan là sơlơ tơnguh tìp mat sùm đah 2 gah mờ gàr sùm ală broă lơh lùp lăp gam geh tŭ do.

Cau mblàng K’Hạnh