Tàm Dơ̆ pơrjum, Mpồl duh broă neh cri bơyai, pơgồp jơnau đơs bè ală cồng nha neh lơh geh tàm ală gah broă, tàm hơ̆ uă ngan là sền gàr dà lơgar, lơngăp lơngai, lơh broă mờ lơgar ndai tàm tơngai do; cồng nha lơh jăt jơnau lơh nền sồ 05 bơh Ƀộ Cíñ trị khoă XIII bè bơyai lơh Ling klàng làng bol tơngai bơh nam 2021 tus 2030 mờ ală nam pơn jăt tai; Jơnau lơh nền sồ 12 bơh Ƀộ Cíñ trị khoă XIII bè lơh pràn bơ̆t bơtàu mpồl Kwang àng làng bol mùl màl kloh niam, pràn kơl dang, jăk chài, ngăc ngar, lơh pa, di pal mờ jơnau kờñ, kơnòl broă tàm tơngai pa.

Củ tịc lơgar ồng Tô Lâm sồr, tơngai tus pal lơh jăt tai, sền gròi, rơcang lài nàng git, kơlôi sơnơng, mblàng loh, sền wơl, yal lài di pal mờ bơta tàm dunia, tàm tiah do, tàm lơgar, tàm hơ̆ uă ngan là ală broă gơlik geh uă, geh nùs nhơm jŏ jòng gơrềng tus sền gàr dà lơgar, lơngăp lơngai lơgar Việt Nam dê nàng di tŭ dan mờ Đảng, Dà lơgar geh ală gùng dà broă lơh nàng bơsong, bañ lời gơtìp ờ thàn, ni sơna tàm ală bơta gơlik geh.