VOV4.K’ho- Drim ngai 11/05, tàm Hìu lơh broă Quôk hội, sơnđờm mut pơrjum dơ̆ 11 bơh Ủy ƀan Thường vụ Quôk hội. Tàm pơrjum dơ̆ do, Ủy ƀan Thường vụ Quôk hội ai jơnau đơs mờ 11 tơngume. Tàm hơ̆, pal sền gròi ngan là jơnau yal bè lơh sa- mpồl bơtiàn mờ kes priă dà lơgar nam 2021 mờ bơta lơh jat ală nhai bồ nam 2022.

Ngan là, tàm pơrjum dơ̆ do, Ủy ƀan Thường vụ Quôk hội ai jơnau đơs bè broă yal mờ Quôk hội in sền sơwì, lơh nền gùng dà broă lơh bơcri priă lơh Rơndap broă lơh gùng pleh 4 tiah càr lơgar Hà Nội, Rơndap broă lơh gùng pleh 3 ƀòn dờng Hồ Chí Minh; rơndap broă lơh bơt bơtàu broă lơh gùng lòt rơndeh ntoăt răt Châu Đốc – Cần Thơ - Sóc Trăng; Rơndap broă lơh  Khánh Hòa - Buôn Ma Thuột; mờ rơndap broă lơh  Biên Hòa - Vũng Tàu. Do là ală rơndap broă lơh dờng màng dà lơgar gơwèt gơnap gơnoar bơh Quôk hội dê lơh nền gùng dà bơcri priă, geh ngui lila khà priă dà lơgar, ală tiah, priă bơcri dà lơgar dimơ tơngai mờ priă bơcri gơwèt bơnah priă gơ hòi lơh sa.

Cau mblàng K’Hạnh