Đơs tàm dơ̆ sơnđờm mut pơrjum, Củ tịc Quôk hội ồng Vương Đình Huệ pà gĭt: kờp dŭ lài tàm 23 ngai lơh broă, Quôk hội sền sơ wì, lơh nền ală tơngume dờng màng. Bal mờ broă lơh bơt bơtàu adat boh lam, tàm dơ̆ pơrjum do, Quôk hội sền sơ wì ring bal 20 rơndap broă lơh dờng màng. Ngan là bè gùng dà broă lơh bơcri priă lơh rơndap broă lơh gùng lòt bơh Gùng dờng 27C tus gùng càr ĐT.656 càr Khánh Hòa- tàm tơrbŏ bal mờ càr Lâm Đồng mờ Ninh Thuận; Lơh niam wơl gùng dà broă lơh bơcri priă lơh rơndap broă lơh Tơnau dơng dà Ka Pét, kơnhoàl Hàm Thuận Nam, càr Bình Thuận...

Tàm pơrjum do, Quôk hội sền sơ wì yal jơnau yal bơh Cíñ phủ dê bè đơs bơtơl cồng nha lơh jat broă rơndap lơh bơtàu tơnguh lơh sa- mpồl bơtiàn mờ kes priă dà lơgar; ring bal kờp dŭ dơ̆ tă ngui kes priă dà lơgar nam 2021. Củ tịc Quôk hội đơs là, ală nhai bồ nam 2023, lơh sa dờng lơgar he dê pơn jat tai kơ̆ kơl jap, roh giă priă geh gròi sền, ală tàm pơnring dờng geh gàr niam, gàr niam rài kis mpồl bơtiàn, niam kwơ mpồl bơtiàn mờ rài kis làng bol dê sền bal là bè ờs.