Pơrjum đơs, pơrjum dơ̆ 7, Quôk hội khoă 15 neh lơh geh cồng nha niam bơnĕ ngan, lơh sir mpồl broă dờng broă lơh tàm jơh bal 3 gah broă lơh adat boh lam, jat sền mờ jơnau lơh nền ală broă kwơ màng bơh Dà lơgar dê, pơn jat tai tam gơl pa, lơh geh  ngai sơlơ niam ngan rlau tai jơnau sồr geh ngan. Jat kờp dŭ lài, pơrjum dơ̆ 8, rơ̆p sơnđờm mut pơrjum tàm ngai 21/10 tus mờ tơn jơh tàm ngai 28/11.

Tàm pơrjum dơ̆ do, kờp dŭ Quôk hội rơ̆p sền sơwì, ring bal 11 rơndăp broă lơh adat; tă pơgồp jơnau đơs 12 rơndăp broă lơh adat; sền sơwì ală broă lơh sa- mpồl bơtiàn, kes priă Dà lơgar, jat sền, lơh dơ̆ lùp mờ hơ jơnau lùp mờ ală broă kwơ màng ndai. Củ tịc Quôk hội ồng Trần Thanh Mẫn đơs là, ală tơngume lơh adat boh lam, jat sền, lơh nền ală broă kwơ màng tàm pơrjum dơ̆ 8 dờng ngan, uă tơngume kal ke ngan den tàng pơn jat tai bơyai lơh pơrjum dơ̆ 8 jat 2 dơ̆ nàng ală anih lơh broă bơh Quôk hội in iăt kơno, mblàng ală jơnau đơs bơh Mpồl cau ala mat Quôk hội mờ bơta niam ngan rlau jơh lài mờ tŭ yal mờ Quôk hội in ring bal.