VOV4.K’ho- Drim do (10/3), tàm hìu lơh broă Quôk hội, mut pơrjum dơ̆ 9 bơh Ủy ƀan Thường vụ Quôk hội dê. Pơrjum do tam pà gơs 2 dơ̆, mờ kờp jơh tơngai lơh broă là 8 ngai. Dơ̆ 1 bơh pơrjum dê geh lơh bơh ngai do tus jơh ngai 17/3. Pal sền gròi là dơ̆ pơrjum do, Ủy ƀan Thường vụ Quôk hội lời 1 ngai lơh broă nàng lam lơh lùp mờ hơ jơnau lùp bơh kwang bàng Quôk hội dê mờ 2 nă kwang bàng Cíñ phủ. Ƀộ trưởng Ƀộ Kông thương ồng Nguyễn Hồng Diên mờ Ƀộ trưởng Ƀộ Tài nguyên mờ Môi trường ồng Trần Hồng Hà geh hơ jơnau lùp tàm dơ̆ lùp sơn rờp bơh Ủy ƀan Thường vụ Quôk hội khóa 15 dê.

Tơngume lùp Ƀộ trưởng Ƀộ Kông thương ồng Nguyễn Hồng Diên geh tơrgùm bè broă lơh gơlik, tac xăng zờu; broă lơh đơng pơlam khà priă xăng zờu tàm tơngai lài. Tơngume lùp Ƀộ trưởng Ƀộ Tài nguyên mờ Môi trường ồng Trần Hồng Hà geh tơrgùm bè broă lam lơh jat Nghị quyết bè lùp mờ gròi sền tơngume bơh Quôk hội dê gơ rềng tus rơndap ù tiah, atbồ, ngui ù tiah tàm tiah drà. Dơ̆ lùp mờ hơ jơnau lùp kờp dŭ geh lơh tàm ngai 16/3 do, geh lơh tàm Hìu pơrjum Diên Hồng, Hìu lơh broă Quôk hội mờ pờ tơlik tơn tàm anih sơñio rùp mờ 63 Mpồl kwang bàng Quôk hội tàm ală càr, ƀòn dờng gơ wèt dà lơgar mờ geh pờ tơlik tơn nàng gal ngan cau tĕ khà mờ làng bol in jat sền.

Cau mblàng K’Duẩn