VOV4.K’ho - Drim òr (09/03) tàm Hà Nội geh bơyai lơh pơrjum dơ̆ sơnrờp bơh Pơrjum dờng cau ala măt cau ùr gùt lơgar dơ̆ 13, tơngai lơh broă bơh nam 2022 tus 2027. Tus bal geh 1 rơbô nă kwang bàng ala măt cau ùr geh pơnrơ jăk, ala măt ală mpồl cau ùr, ală jơi bơtiàn kòn cau, gah jăt yàng mờ ală broă broă krơi is tàm gùt lơgar. Pơrjum dờng geh bơyai lơh bơh ngai òr (09/03) tus jơh ngai 11 nhai 3.

Mờ tơngu me “Tơnguh bơhiàn tam klăc bal, bơceh lơh, tài bơta pas sơm dà lơgar”, Pơrjum dờng đơs broă mpồl cau ùr mờ broă lơh mpồl tam klăc cau ùr Việt Nam tàm tơngai do, ai geh gùng dà broă lơh, kơnòl broă lơh, ală broă lơh pràn tàm tơngai lơh broă bơh nam 2022 tus 2027 mờ pồ geh Mpồl đơng lam Mpồl tam klăc cau ùr Việt Nam khoă 13. Tàm pơrjum dơ̆ sơnrờp, ală kwang bàng neh cri bơyai nàng rơwah Mpồl kwang bàng Củ tịc Pơrjum dờng, mpồl cih sră Pơrjum dờng, ring bal Pơrjum dờng mờ kơrnoăt Pơrjum dờng. Lài mờ hơ̆, ală kwang bàng neh mŭt tàm gơlang ies Củ tịc Hồ Chí Minh, pơdơng goàng bơkào tềng jơnang duh khoai cau ling khin cha chơ̆t màng Bắc Sơn.

Cau mblàng Ndong Brawl