VOV4.K’ho- Mho ngai 29/8, tàm Hà Nội, geh lơh Pơrjum dờng cau ala mat gùt lơgar Mpồl Cữ thập đỏ Việt Nam dơ̆ 11, tơngai lơh broă bơh nam 2022 tus nam 2027, mờ bơta tus bal bơh rlau 500 nă cau ala mat jak ngan, ala mat rlau 7 tơlak 200 rbô nă kwang bàng, cau tàm mpồl, cau lơh broă dong kờl is, ơruh pơnu kơnòm pa tàu Cữ thập đỏ gùt lơgar.

Pơrjum dờng Mpồl Cữ thập đỏ Việt Nam dơ̆ 11 mờ uă kơnòl kuơmàng, tàm hơ̆, sền sơ wì cồng nha broă lơh mpồl mờ srơh Cữ thập đỏ tơngai lơh broă bơh nam 2017 tus nam 2022; lơh nền jơnau kờñ, kơnòl broă, broă jàu, gùng dà ai tơlik lài mờ ală broă lơh kuơmàng nàng kờñ sơlơ tơnguh tơl làm broă lơh Mpồl mờ srơh Cữ thập đỏ tàm tơngai lơh broă bơh nam 2022 tus nam 2027. Tơngai lơh broă lài, Mpồl Cữ thập đỏ tàm gùt lơgar neh sùm bơceh pa, lam lơh ală srơh, ală broă lơh dong kờl kòn bơnus tus uă mpồl cau tàm mpồl bơtiàn mờ priă jền rlau 23 rbô tơmàn đông, dong kờl kờp bal pah nam ai rlau 18 tơlak dơ̆ cau in. Tàm pơrjum dơ̆ 1 Pơrjum dờng cau ala mat gùt lơgar Mpồl Cữ thập đỏ Việt Nam neh pồ Ƀan Cấp hàñ Mpồl Cữ thập đỏ dà lơgar Việt Nam khoă 11, tơngai lơh broă bơh nam 2022 tus nam 2027 mờ bơyai lơh Pơrjum Ƀan Cấp hàñ Mpồl Cữ thập đỏ dà lơgar khoă 11 dơ̆ 1.

Cau mblàng K’Duẩn