VOV4.K’ho - Drim òr (14/01), tàm Hà Nội, Mpồl cau dờng sơnam Việt Nam bơyai lơh Pơrjum dờng dơ̆ 6, tơngai lơh broă bơh nam 2021 tus 2026. Ală nam do, broă “Sơnam dờng-Bồ tơngoh ngăc ngar” neh hòi jà git nđờ tơlăk nă cau dờng sơnam tus bal; neh geh 650 rơbô nă cau dờng sơnam tus bal broă lơh mpồl bơtiàn tàm ală tiah bè: Ƀí thư Chi ƀộ, atbồ mpồl ƀòn, Mpồl cah rơña, broă lơh mặt trận mờ ală mpồl lơh broă mpồl bơtiàn pơgồp bal tàm broă bơ̆t bơtàu mpồl lơh broă cíñ trị tàm ală ƀòn pràn kơl dang.

Đơs tàm Pơrjum dờng, Phó Củ tịc Quốk hội ồng Trần Thanh Mẫn đơs tờm, broă git wă nùs nhơm bồ tơngoh bơh Củ tịc Hồ Chí Minh sùm bơto bơtê ală cau in. Hơ̆ là: tơl nă kwang bàng, cau geh đảng, công chức, viên chức pal git jơnau mờ lă mò, ồng neh kra. Dan mpồl cau dờng sơnam pơn jăt tai tam gơl pa gùng dà broă lơh, tơrgùm gah cau rơlao tai tàm mpồl tus bal broă lơh jăt broă pơrlòng “Sơnam dờng-Bồ tơngoh ngăc ngar”.

Cau mblàng Ndong Brawl