VOV4.K’ho - Pơrjum dờng kwang bàng ala măt cau ùr gùt lơgar dơ̆ 13, tơngai bơh nam 2022 tus 2027 geh bơyai lơh bơh ngai 9 tus ngai 11 nhai 3 nam 2022. Do là tơngai sơnrờp ngan lơh jăt broă lơh jŏ jòng tơnguh bơtàu Mpồl tam klăc cau ùr Việt Nam tus nam 2030, wèt tus nam 2035.

Do là jơnau yal geh Mpồl tam klăc cau ùr Việt Nam pà git tàm pơrjum ƀăo drim òr (01/03), tàm Hà Nội. Mờ tơngu me “Đòm jăt bơhiàn ờs mờng, tam klăc bal, bơceh lơh, tài bơta pas gơs dà lơgar dê”, Pơrjum kwang bàng ala măt cau ùr gùt lơgar dơ̆ 13 geh sền wơl broă lơh cau ùr mờ broă lơh mpồl tam klăc cau ùr Việt Nam tơngai bơh nam 2017 tus 2021, ai geh jơnau kờñ, gùng dà kơnòl broă lơh, ală broă lơh pràn tàm tơngai bơh nam 2022 tus 2027 mờ pồ geh Mpồl đơng lam Mpồl tam klăc cau ùr Việt Nam khoă 13. Kờp dŭ pơrjum dờng do geh 1 rơbô nă kwang bàng mùl màl là ală cau ùr geh pơnrơ jăk, ala măt ală mpồl cau ùr, ală jơi bơtiàn kòn cau, gah jăt yàng mờ ală gah lơh broă krơi is tàm gùt lơgar tus bal.

Cau mblàng Ndong Brawl