Geh Tổng Liên đoàn Lao động Việt Nam rơ wah lam lơh pơrjum dờng lài Gah 10 Liên đoàn Lao động càr tiah đah jum tàm gùl lơgar mờ Tây Nguyên, tàm 2 ngai, 25 mờ 26/7, tàm ƀòn dờng Kon Tum geh bơyai lơh Pơrjum dờng Kông đoàn càr Kon Tum dơ̆ XI, tơngai lơh broă bơh nam 2023 tus nam 2028. Mờ jơnau đơs “Tam gơl pa- ring bal jơnau đơs- tam klac bal- bơtàu tơnguh”, Pơrjum dờng Kông đoàn càr Kon Tum dơ̆ XI, tơngai lơh broă bơh nam 2023 tus nam 2028 neh tơn jơh, sền sơ wì broă lam lơh jat Nghị quyết Pơrjum dờng dơ̆ X, tơngai lơh broă bơh nam 2018 tus nam 2023; git nền jơnau kờñ, gùng dà, kơnòl broă srơh kông ñân, viên chức, cau lơh broă mờ broă lơh Kông đoàn tơngai lơh broă bơh nam 2023 tus nam 2028.

Tơngai lơh broă lài, bulah gơtìp uă kal ke, bơta lòng, ngan là gơ rềng bơh kòp Kovid-19 dê, mơya broă lơh kông đoàn càr Kon Tum dê lơh geh uă cồng nha kuơmàng. Ală kâp Kông đoàn lam lơh niam kơnòl broă ala mat, sền gàr gơnoar, bơta kuơ dipal bơh đoàn viên mờ cau lơh broă dê in. Pơrjum Kông đoàn càr Kom Tum dơ̆ XI, tơngai lơh broă bơh nam 2023 tus nam 2028 neh pồ Ƀan Cấp hàñ Liên đoàn Lao động càr tơngai lơh broă pa mờ 32 nă cau geh jơng; pồ 8 nă kwang bàng lòt Pơrjum dờng dơ̆ XIII kông Đoàn Việt Nam. Ồng Rơ Chăm Long, geh pồ wơl lơh Củ tịc Liên đoàn Lao động càr Kon Tum.