Ngai 21/08, Anih duh broă Mặt trận Dà lơgar Việt Nam càr Dăk Nông bơyai lơh Pơrjum dờng cau ala mat dơ̆ V, tơngai lơh broă bơh nam 2024-2029 mờ tơngume tơnguh uă gơnoar broă tờm cíñ trị bơh Mặt trận dà lơgar Việt Nam dê; lơh jat làng bol lơh tờm, sơlơ tơnguh bơta pràn tàm klăc dờng jơh gùt làng bol; tam gơl pa tơnguh uă cồng nha lơh broă Mặt trận dê, pơgồp bơnah bơt bơtàu càr Dăk Nông pas niam, niam jak.

Ồng Nguyễn Phú Nghĩ, Phó Củ tịc Anih duh broă Mặt trận Dà lơgar Việt Nam càr Dăk Nông đơs nền, Pơrjum dờng dơ̆ V neh ai tơlik uă broă lơh pa, lơh bè lơi nàng Mặt trận Dà lơgar Việt Nam ală kấp tàm càr in lơh jat niam gơnoar broă, is ồn tàm broă lơh jat sền mờ hơ jơnau lùp mpồl bơtiàn. Pơrjum dờng neh dồ nùs pồ geh 69 nă Kwang bàng Anih duh broă Mặt trận Dà lơgar Việt Nam càr Dăk Nông khoă V tơngai lơh broă bơh nam 2024-2029. Tàm pơrjum dơ̆ 1, ală kwang bàng neh dồ nùs pồ mò Hà Thị Hạnh, Kwang bàng Mpồl Lơh kơnòl broă sùm Tỉñ ủy càr, Kwang atbồ Mpồl hòi jà làng bol at gơnoar broă Củ tịc Anih duh broă Mặt trận Dà lơgar Việt Nam càr Dăk Nông khoă pa. Pơrjum kung dồ nùs pồ mpồl cau ala mat tus bal Pơrjum dờng cau ala mat gùt lơgar Mặt trận Dà lơgar Việt Nam dơ̆ X geh 6 nă kwang bàng ngan ngồn, 2 nă kwang bàng rcang lài.