VOV4.K’ho- Mho ngai 06/03, tàm ƀòn dờng Đà Nẵng, geh lơh Pơrjum Duh broă sùm Hội đồng Ñân zân ală càr mờ ƀòn dờng Tiah tàm gùl lơgar mờ Tây Nguyên dơ̆ dùl, tơngai bơh nam 2021- 2026. Ală kwang bàng iăt jơnau yal tă pơgồp jơnau đơs bơh Duh broă sùm Hội đồng Ñân zân ală càr mờ ƀòn dờng dê lơh loh bè pe broă.

Lài ngan là “Mờng chài tàm broă tơnguh uă bơta niam mờ cồng nha dơ̆ pơrjum Duh broă sùm Hội đồng Ñân zân kâp càr bè ală broă mblàng yal lơh loh bơh ală anih lơh broă, mpồl cau mờ cau dùl nă să is dê jăt Adat Bơyai lơh gơnoar ătbồ tiah he dê”. Broă dơ̆ bàr là “Broă tam gơl pa gùng dà, tơnguh uă cồng nha lơh broă jăt sền, lùp sền wơl jơnau yal, rơndăp broă lơh, jơnau rơcăng cih kơrnoăt sền mờ yal mờ dơ̆ pơrjum”. Broă dơ̆ pe là “Mờng chài, gùng dà broă lơh tơnguh bơta niam, cồng nha lơh broă jăt sền, lùp sền wơl bơh ală ƀan bơh Hội đồng Ñân zân dê”. Đơs pơndŭt dơ̆ Pơrjum, ồng Trần Thanh Mẫn, Phó Củ tịc Duh broă sùm Quôk hội sồr Duh broă sùm Hội đồng Ñân zân ală tiah pal pơn jăt tai lơh jăt nùs nhơm “rơcăng lài, bơceh pa mờ ngac ngar” tàm broă lơh jăt gơnoar broă, kơnòl broă; jăt sền ală tam gơl pa bơh Quôk hội dê nàng gơtùi đòm jăt, lơh bal dipal mờ tơl tiah.

Cau mblàng Lơ Mu K’Yến