VOV4.K’ho - Ngai òr (20/09), tàm càr An Giang geh bơyai lơh pơrjum dunia lơh gùng nhàr dà lơgar đah lơgar Việt Nam mờ lơgar Campuchia ring lơngai, git gơ̆p, lơh bơyô, lơh broă bal tơnguh bơtàu dơ̆ 6 nam 2022.

Ủy ƀan Mặt trận Dà lơgar Việt Nam mờ Mpồl duh broă Dà lơgar Mặt trận Tam klăc bal Tơnguh bơtàu lơgar Campuchia kĭ hơ bal jơnau yal bal dơ̆ 6

Đơs tàm dơ̆ sơn đờm pơrjum, ồng Lê Tiến Châu, Phó Củ tịc, Tổng Thư ký Ủy ƀan Mặt trận dà lơgar Việt Nam đơs tờm, tơnơ̆ mờ rơlao 5 nam kĭ jơnau yal bal cồng nha Pơrjum dunia bè lơh gùng nhàr dà lơgar ring lơngai, git gơ̆p, lơh bơyô bal đah lơgar Việt Nam mờ lơgar Campuchia, ală tơngu me geh lơh jăt ngai sơlơ ơnàng tàm ală kấp, geh cồng nha mùl màl, tàm hơ̆ uă ngan là tàm ală càr geh bal gùng nhàr dà lơgar, di pal mờ jơnau kơ̆p kờñ bal bơh làng bol đah bàr lơgar dê. Tàm pơrjum do, ală kwang bàng geh cri bơyai, sền wơl cồng nha lơh jăt jơnau yal bal tàm pơrjum dơ̆ 5, pơgồp bal tàm tơngu me rơndăp broă “Jơnau yal bal cồng nha bè pơrjum dunia lơh gùng nhàr dà lơgar đah lơgar Việt Nam mờ lơgar Campuchia ring lơngai, git gơ̆p, lơh bơyô bal, lơh broă bal tơnguh bơtàu dơ̆ 6 nam 2022” mờ ai geh ală tam gơl pa bè tơngu me, broă lơh nàng tơnguh uă nùs nhơm mùl màl, geh cồng nha tàm broă lơh bal đah bàr lơgar tàm tơngai tus.

Cau mblàng Ndong Brawl