VOV4.K’ho- Drim ngai 25/4, tàm hìu lơh broă Cíñ phủ, Mpồl đơng lam dà lơgar bè rơcang sơndră trồ tiah lơh aniai pơgồp bal mờ Ủy ƀan dà lơgar rơcang sơndră trồ tiah lơh aniai mờ jòi dong kờl rềs àr bơyai lơh Pơrjum gùt lơgar bè broă lơh rơcang sơndră trồ tiah lơh aniai mờ jòi dong kờl rềs àr nam 2022. Phó Thủ tướng ồng Lê Văn Thành, Kwang atbồ Mpồl đơng lam dà lơgar neh đơng lam pơrjum.

Đơs mut pơrjum, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan, Phó Kwang atbồ Ƀan Thường trựk pà git, nam 2021, bulah ală lơgar tàm dunia neh lơh ngan rơcang sơndră mơya trồ tiah lơh aniai neh lơh 16 rbô nă cau chơt, roh thit, kờp jơh hoàc huơr bè lơh sa rlau 340 tơmàn dolar Mỹ mờ gơ rềng tus tơl gah bơh rài kis, lơh sa- mpồl bơtiàn bơh uă lơgar, uă tiah dê.

Jat jơnau đơs bơh Anih tờm yal lài trồ tiah dà lơgar dê, nam 2022 digơlan geh càl rbut pràn ờ di mờ bơta bè ờs, bal mờ pơgap bơh 10 tus 12 dơ̆ mìu nhàc tàm tiah dà lềng đah mat tơngai lik. Bơh broă gơlik geh trồ tiah lơh aniai bơh bồ nam tus tŭ do, gơtùi gŏ, trồ tiah lơh aniai nam 2022 digơlan pơn jat tai gơlik geh kal ke mờ ờ gơtùi kờp dŭ lài.

Cau mblàng K’Duẩn