VOV4.K’ho- Drim ngai 21/07, Pơrjum gùt lơgar kơlôi sơnơng, bơsram mờ lơh jăt Kơrnoăt Pơrjum dơ̆ 05 Ƀan Câp hàñ Đảng Dà lơgar khoă XIII neh geh lơh tàm Hìu Quôk hội mờ tàm tơrbŏ bal bơh tàm internet mờ 63 càr, ƀòn dờng tàm jơh gùt lơgar.

Tàm pơrjum, Thủ tướng Cíñ phủ ồng Phạm Minh Chính neh yal wơl tơngume bè “Pơn jăt tai tam gơl, lơh sir kơrnoăt boh lam, gùng dà broă lơh, tơnguh uă jơnau lơh gơtùi, geh cồng nha ătbồ mờ ngui ù, lơh geh bơta gơn kơnờm ai dà lơgar he gơ gơs là lơgar bơtàu tơnguh geh priă lơh geh uă” tàm Kơrnoăt sồ 18, ngai 16/06/2022 bơh Ƀan Câp hàñ Đảng Dà lơgar dê nàng kờñ lơh jăt jrô ơnàng làm uă, lơh geh bơta ring bal uă tàm bơta gĭt wă mờ lơh broă tàm jơh gùt Đảng, gùt làng bol, gùt ling klàng nàng lam lơh jăt gơ in niam ngan Kơrnoăt kwơmàng do.

Thủ tướng neh yal loh 4 bơnah tàm Kơrnoăt sồ 18 bal mờ 4 bơnah, Dơ̆ sơnrờp, ală jơnau bơnàng jă lơh cơng tàng lơh, lơh sir kơrnoăt boh lam bè ù tiah; Dơ̆ bàr, bơta kờñ ngan pal pơn jăt tai tam gơl pa, lơh sir kơrnoăt boh lam, gùng dà broă lơh, tơnguh uă bơta gơtùi lơh jăt, geh cồng nha ătbồ mờ ngui ù; Dơ̆ pe, jơnau kơlôi, jơnau kờñ; Dơ̆ puan, kơnòl broă, broă lơh; Dơ̆ pram, lam lơh jăt.

Cau mblàng Lơ Mu K’Yến