Do là jơnau yal geh đơs tàm pơrjum gùt lơgar sền wơl broă lơh lòt sền, jat sền 6 nhai bồ nam mờ lam lơh kơnòl broă 6 nhai lồi nam do. Kwang bàng tàm Ƀộ Cíñ trị, Ƀí thư Đảng Dà lơgar, Củ ñiệm Ủy ƀan Sền sơ wì Dà lơgar ồng Trần Cẩm Tú đơng lam pơrjum.

Đơs tàm pơrjum, ồng Trần Cẩm Tú pà gĭt: bơh lòt sền, jat sền pơgồp bơnah tơnguh uă bơta pràn jak đơng lam, bơta pràn tam dră wơl bơh mpồl Đảng mờ kơryan, rcang sơndră, tơrmù ƀà bơta ờ niam bè bồ tơngoh, cíñ trị, nùs nhơm, rài kis bơh bàr pe nă mpồl kwang bàng, đảng viên. Ồng Trần Cẩm Tú sồr Ủy ƀan Sền sơ wì Dà lơgar mờ Ủy ƀan Sền sơ wì ală kấp rcang lơh jat broă lơh rơndăp tăp sèng, pồ tơl kwang bàng, tơnguh uă bơta chài mpồl kwang bàng lòt sền ală kấp.