VOV4.K’ho- Ngai 16/9, Ủy ƀan Ñân zân càr Dăk Nông bơyai lơh Pơrjum jak chài ai jơnau đơs tă pơgồp tàm Rơndap ù tiah càr Dăk Nông tơngai bơh nam 2021 tus nam 2030, broă wèt sền tus nam 2050, mờ bơta tus bal bơh uă cau jak chài khà dùl tàm gah rơndap ù tiah, kông ty pơlam broă lơgar ndai, ala mat ală tập đoàn dờng.

   Pơrjum jak chài ai jơnau đơs tă pơgồp tàm Rơndap ù tiah càr Dăk Nông tơngai bơh nam 2021 tus nam 2030

Tàm pơrjum, ală kwang bàng neh mblàng lơh loh, tă pơgồp jơnau đơs nàng Dăk Nông đal git loh rlau tai ală bơta ờ niam mờ ai tơlik ală broă lơh, rơndap broă nàng càr in ngui niam, ngui geh cồng nha ală bơta ƀuơn, bơta pràn, lơh gơlik bơta tam gơl tàm bơtàu tơnguh lơh sa- mpồl bơtiàn. Jat Tiến sĩ Nguyễn Trọng Uyên, lài do là Phó Kwang atbồ Viện Rơndap ù tiah mờ bơceh lơh sa suơn sre đơs, dùl tàm ală bơta pal sền gròi tàm rơndap ù tiah tơrgùm bal do là Dăk Nông pal ngui niam ală bơta krơi is. Bơta krơi is bơh càr dê là geh khà Bauxit uă khà dùl dunia, geh trồ tiah mrềt niam gùt nam, geh Kông viên địa cất gùt plai ù UNESCO; bal mờ hơ̆ ơm tàm anih ƀuơn tàm gùng tơrbŏ tiah Tây Nguyên mờ tiah đah jum mat tơngai lik dà lơgar, là ală bơta ƀuơn ngan nàng càr in bơtàu tơnguh pràn kơldang bè lơh sa mờ măi mok tơnhàu phan kuơ tàm ù mờ nhơl chờ.

Cau mblàng K’Duẩn