VOV4.K’ho- Drim ngai 11/01, tàm Hà Nội, Anh Cah rña làng bol dờng ngan rlau jơh dà lơgar bơyai lơh Pơrjum Jak chài “Lơh niam wơl sền gàr adat boh lam tàm Anih cah rña làng bol tus nam 2030, pơlam gùng wèt tus nam 2045 lơh geh jơnau kờñ bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam”.

Ủy viên Ƀộ Cíñ trị, Củ tịc lơgar ồng Nguyễn Xuân Phúc, Kwang ătbồ Mpồl đơng lam lơh niam wơl sền gàr adat boh lam dà lơgar, Kwang ătbồ Mpồl đơng lam Rơndăp broă lơh “Broă rơndăp lơh bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam tus nam 2030, pơlam gùng wèt tus nam 2045” tus bal mờ đơs sồr lơh. Đơs tàm dơ̆ pơrjum, Củ tịc lơgar ồng Nguyễn Xuân Phúc sồr pal dan ală broă lơh lơh niam wơl pa tàm tơngai bơh tŭ do tus nam 2030, pơlam gùng wèt tus nam 2045 dipal mờ bơta gơlik geh ngan ngồn bơh dà lơgar dê mờ gùng dà bơtàu tơnguh bal bơh dunia dê. Tơrgùm tàm ală broă lơh lơh niam wơl bè rơndăp lơh mờ lơh broă bơh Anih cah rña làng bol dê; jàu nền loh làng gơnoar ătbồ hàñ cíñ bơh anih cah rña dê nàng sền gàr gơnoar krơi is đah ală kấp anih cah rña; tam gơl pa, lơh sir sră nggal yal yă sền gàr adat boh lam mờng chài mờ geh cồng nha.

Cau mblàng Lơ Mu K’Yến