VOV4.K’ho- Di tơngkah kir sơnrai 50 nam tam lơh pha lin Đăk Tô- Tân Cảnh (24/04/1972- 24/04/2022), tàm ƀòn dờng Kon Tum, Ƀộ Quôk phòng drơng lơh pơgồp bal mờ Tỉñ ủy Kon Tum bơyai lơh dơ̆ Pơrjum jak chài kâp Ƀộ Quôk phòng mờ tơngume: “Tam lơh pha lin Đăk Tô- Tân Cảnh: Bơta kwơ jơnau kah yau mờ Jơnau bơsram mờng chài”. Pơrjum mờ bơta tus bal bơh rlau 250 nă cau ala măt dê, là cau kwang ling mờ cau kwang ling lài do; Cau khin cha jak chài mpồl ling klàng phàu crong làng bol; cau lơh cơng sền gŏ jơnau kah yau; cau jak chài; cau ling yau; cau ala măt anih lơh broă kâp dà lơgar, càr Kon Tum mờ uă càr, ƀòn dờng tàm gùt lơgar, neh lơh pơnrơ ngan bơta kwơ jơnau kah yau bơh tam lơh pha lin Đăk Tô- Tân Cảnh dê tàm dơ̆ tam lơh jŏ jòng ngan bơh jơi bơtiàn he dê.

Neh rlau nggùl rài do, bơh bơta đơng lam mờ sồr lơh bơh Đảng dà lơgar, Quân ủy Dà lơgar, mờ să tờm tơn là Gah đơng lam tiah tam lơh Tây Nguyên, ngai 24/04/1972 ling klàng mờ làng bol he sò tơm mpồl rơcăng gàr lài bơh mpồl ling Sài Gòn dê tàm Đăk Tô- Tân Cảnh mờ ai geh bơta jai pha.

Tam lơh pha lin Đăk Tô- Tân Cảnh pơgồp bơnah lơh gơs bơta jai pha kơnòl broă dơ̆ dùl dơ̆ tam lơh tiah đah tô Tây Nguyên. Do kung là dơ̆ tam lơh bơh sơnrờp mpồl ling klàng phàu crong Tây Nguyên tam lơh mờ bol sò tơm bơh tơrgùm jơh mpồl ling dờng, geh bơta mhar tam lơh jai pha dùl mpồl ling sư đoàn, lơh gơprah gơpreng jơh mpồl ling rơcăng gàr lài kwơmàng ngan, kơ̆ kơl jăp ngan rlau jơh tàm ală anih rơcăng gàr lài bơh Mpồl ling Sài Gòn dê tàm tiah đah tô Tây Nguyên, pờ tơlik bơta tơl pràn gơtùi tam lơh gơ sơ̆t chơ̆t uă, wèt tus tơngklàs jơh tiah Tây Nguyên. Tam lơh pha lin Đăk Tô- Tân Cảnh neh tơngklàs dùl kơnhoàl ù tiah dờng ơnàng bơh càr Kon Tum dê bal mờ 25 rbô nă làng bol bơh Đăk Tô- Tân Cảnh tus Võ Định.

 Mpồl Kwang ătbồ Pơrjum

Đơs nền bơta gơtha kwơmàng bơh Pơrjum jak chài “Tam lơh pha lin Đăk Tô- Tân Cảnh: Bơta kwơ jơnau kah yau mờ Jơnau bơsram mờng chài dê”, Thượng tướng, Tiến sĩ Lê Huy Vịnh, Ủy viên Ƀan cấp hàñ Đảng Dà lơgar, Ủy viên Quân ủy Dà lơgar, Thứ trưởng Ƀộ Quôk phòng, Kwang ătbồ Mpồl đơng lam Pơrjum đơs sùm: Pơrjum là tŭ nàng jơh gùt Đảng, gùt làng bol, gùt ling klàng kah wơl bơhiàn tam lơh khin cha jak chài bơh ală rơnàng bèp, rơnàng bi dê, kah kơlôi wơl tus ală oh mi, làng bol neh tam lơh, phi să tàm dơ̆ tam lơh jŏ jòng nàng ai geh mờ gàr bơta lơngăp lơngai is jơi bơtiàn in, khăt gơboh is mờ tơrgùm dùl Dà lơgar. Cồng nha bơh Pơrjum dê geh pơgồp bơnah sơlơ lơh tơngkah wơl nùs nhơm kờñ gơboh dà lơgar, nùs nhơm pơñiờ să, yờ tơnguh is jơi bơtiàn, bồ tơngoh kơ̆p kờñ lơngăp lơngai is, lơh tờm is, pơđơl pràn is mờ kơ̆p kơnờm ngan ring lơngai, kơ̆ kơl jăp bơta pin dờn mờ jơh nùs lơh ngan cíñ trị bơh jơh gùt Đảng, gùt làng bol, gùt ling klàng”.

Mờ rlau 80 jơnau yal, jơnau cih tă pơgồp jơnau đơs, tàm hơ̆ geh uă jơnau cih tă pơgồp jơnau đơs bơh ală kwang bàng đơng lam bồ, lài do là kwang đơng lam bồ Quân ủy Dà lơgar, Ƀộ Quôk phòng, ală tiah, ală kwang bàng là cau kwang ling, ling geh griăt, cau lơh cơng sền gŏ jơnau kah yau, ală cau jak tàm dơlam mờ bơdìh mpồl ling pơyua tus mờ sền đơs tơn tàm Pơrjum neh lơh loh jơnau jòi kai, kai kơrmơi bơh bol sò tơm Mỹ mờ gơnoar ătbồ Sài Gòn dê; Bơta rơcăng mờ bơta pràn bơh kăc màng tiah đah jum dà lơgar dê mờ jơnau kờñ lơh dơ̆ sò tơm kwơmàng ai geh bơta pha lin lơh nền tam lơh lơh gơlừ dùl cơnđoà dờng màng jŏ jòng “Việt Nam tam gơl tam lơh”. Ồng Trần Thanh Dân, lài do là Phó Ƀí thư Tỉñ ủy Kon Tum, nam do 96 sơnam sền gròi ngan tus broă ai geh, sền gàr mờ ngui niam bơta pràn nùs nhơm làng bol tàm dơ̆ tam lơh pha lin Đăk Tô- Tân Cảnh, đơs: Ai geh nùs nhơm làng bol là geh sò tơm mờ ntàu guh. Geh nùs nhơm làng bol ndrờm bal mờ ling ờ jòi swì khăt gơboh gơlềng gơlàng tam lơh aniai he. Hơ̆ là ling klàng mờ jòi tơr kwĕ gơlềng gơlành tam lơh aniai he, den he tìp kal ke uă ngan, hoàc hươr mờ digơlan ờ jai ơm jŏ geh tàm tiah sò tơm dê. Hơ̆ là ling ờ gŏ dră he den gơnoar ătbồ bol Ngụy tiah ƀòn lơgar geh rơhời gơtìp ờ pràn mờ rơhời gơtìp nrah nring is. Bơta rơcăng mờ bơta pràn bơh làng bol dê gơguh tai bol sò tơm ờ jai là bè hơ̆.

Thượng tướng- Tiến sĩ Lê Huy Vịnh đơs tàm Pơrjum

Ală jơnau cih tă pơgồp jơnau đơs geh sền tàm dơ̆ Pơrjum kung đơs nền, lơh loh gùng dà, nùs nhơm, jơnau sồr đơng lam, sồr lơh dơ̆ tam lơh dră wơl bol Mỹ sò tơm dong klàs dà lơgar; Gùng dà broă lơh dipal, di tŭ bơh Đảng dà lơgar dê, mờ să tờm tơn là Quân ủy Dà lơgar mờ Ƀộ Quôk phòng tàm bơta jơh nùs lơh ngan pờ dơ̆ sò tơm kwơmàng nam 1972; Lơh tơngŏ wơl ală tŭ đơng lam, sồr lơh rơndăp lơh mờ tàp lơh ală broă tam lơh ngac ngar, bơceh lơh; Ală jơnau bơsram mờng chài bè bơta chài sồr lơh tam lơh dơ̆ tam lơh, bơta chài tam lơh; Ngui niam mờ đòm jăt bơceh lơh tàm bơta geh ngan bơ̆t bơtàu tiah rơcăng gàr lài, lơh kơ̆ kơl jăp nùs nhơm rơcăng gàr lài sền gàr dà lơgar, lơngăp lơngai, sền gàr kơ̆ kơl jăp Dà lơgar Việt Nam xã hội củ nghĩa.

Pơñiờ să mờ bơhiàn bơh mpồl ling pràn tờm ngan Tây Nguyên khin cha jak chài, pơñiờ să mờ măt sơnđan Ƀiñ đoàn Tây Nguyên, là Mpồl ling tờm pràn ngan lòt ntrờn làm bă tiah bơh Ƀộ Quôk phòng dê jă jơng lơh kơnòl broă tàm ù tiah kwơmàng Tây Nguyên, Thiếu tướng- Tiến sĩ Nguyễn Anh Tuấn, Kwang ătbồ Quân đoàn 3, đơs nền: Kwang bàng, cau ling Quân đoàn 3 gŏ loh bơta chờ hờp mờ kơnòl dờng ngan tàm broă lơh sền gàr dà lơgar. Quân đoàn neh tơrgùm lơh jăt dùl ròt ală broă lơh bơt bơtàu mpồl pràn kơldang kơ̆ kơl jăp tơl làm. Kwang bàng, cau ling jơh gùt Quân đoàn jơh nùs ơm rềp mờ ƀòn lơgar, lơh broă mờ ƀòn lơgar bơ̆t bơtàu nùs nhơm tam klăc bal, ơm kis đềt mềr bal bè cau pròc mhàm tờm mờ Làng bol, lơh kơ̆ kơl jăp bal nùs nhơm rơcăng gàr lài tàm làng bol tàm ù tiah kwơmàng Tây Nguyên lơh gơlik bơta pràn tơrgùm bal lơh jăt jai pha jơh ală kơnòl broă geh jàu.

Kwang bàng tus bal Pơrjum

Pơrjum jak chài “Tam lơh pha lin Đăk Tô- Tân Cảnh: Bơta kwơ jơnau kah yau mờ Jơnau bơsram mờng chài” bơh Ƀộ Quôk phòng drơng lơh pơgồp bal mờ Tỉñ ủy Kon Tum bơyai lơh neh pơgồp bơnah lơh loh làng, jrô ơnàng rlau ală broă tàm sră pơ àr mờ bơat geh ngan gơ tơlik bơh dơ̆ tam lơh pha lin Đăk Tô- Tân Cảnh. Do là cơng tàng jak chài nàng đòm jăt ngui tàm bơta geh ngan lơh jăt kơnòl broă ling klàng, sền gàr dà lơgar, pơgồp bơnah lơh jăt jai pha broă lơh bơ̆t bơtàu mờ sền gàr dà lơgar tàm tŭ tơngai pa. Mơkung là bơnàng jă kơ̆ kơl jăp nàng tam lơh đơs lah wơl ală jơnau jòi kai, kai kơrmơi tam dră lơh aniai, đơs bu ba tìs ờ di jơnau kah yau bơh ală bol gơjrañ kwềng, pơrlơ̆ dră mờ dà lơgar, pơgồp bơnah bơto tơngkah bơhiàn tam lơh tam gơl bơta yau gơ gơs bơta pa, sơlơ lơh tơngkah wơl nùs nhơm kờñ gơboh dà lơgar, nùs nhơm pơñiờ să is jơi bơtiàn ai kwang bàng, cau ling mờ Làng bol in, ngan là ală rơnàng cau Việt Nam ngai do mờ tơnơ̆ do.

            Cau cih Khoa Điềm- Cau mblàng Lơ Mu K’Yến