VOV4.K’ho- Tàm Hà Nội pa geh lơh Pơrjum jơh gùtl Ủy ƀan Dà lơgar bè ơruh pơnu Việt Nam dơ̆ sơnrờp. Đơs tàm pơrjum, Phó Thủ tướng ồng Vũ Đức Đam đơs sùm: Chờ hờp sơlơ dờng, kơnòl sơlơ uă, Ủy ƀan Dà lơgar bè Ơruh pơnu Việt Nam pal lam lơh ală broă lơh ờ mìng kơlôi rơcăng niam ơruh pơnu in mờ gam ngui niam bơta pràn kơnòm să, pràn bơceh lơh, bơta tă pơgồp dà kơlhề ơruh pơnu Việt Nam”. Kung tàm pơrjum sơl, neh geh lơh Dơ̆ yal Kơrnoăt 282 bơh Thủ tướng Cíñ phủ dê cih gơnoar broă, kơnòl broă, gơnăp gơnoar mờ gùng dà lơh broă bơh Ủy ƀan Dà lơgar bè Ơruh pơnu Việt Nam dê.

Ơruh pơnu Việt Nam tŭ do geh rlau 22 tơlak 100 rbô nă cau, geh tus 22,5% khà kờp làng bol gùt lơgar. Ơruh pơnu tiah ƀòn lơgar geh tus mờr 60%, ơruh pơnu tiah ƀòn dờng, ƀòn drà rlau 40%. Khà ơruh pơnu geh tơl broă lơh tàm kờp jơh khà ơruh pơnu tàm sơnam lơh broă geh tus 98,7%. Sền bal, ơruh pơnu iang nùs, pin dờn mờ kờñ bal mờ ală gùng dà bơh Đảng dê, bơta sồr lơh mờ đơng lam kràñ cê jơh nùs bơh Cíñ phủ dê, ngan là pin dờn tàm broă lơh dong kờl lơh gơkờñ, bơtàu tơnguh lơh sa bơh Cíñ phủ dê geh lơh jăt geh cồng nha. Uă ngan ơruh pơnu geh bồ tơngoh gĭt wă bơsram sră, sùm bơsram tàp, lơh ngan nàng sơnđờm mŭt lơh broă, jòi broă lơh broă sa, jơh nùs tus bal lơh ală broă lơh mpồl bơtiàn, lơh broă dong kờl is, ngan là ală broă lơh dong kờl is tài rài kis mpồl bơtiàn, tus bal rơcăng sơndră mờ kơryan kòp Kovid-19, trồ tiah lơh aniai; ngai sơlơ gơdờp bal mờ gùng dà lơh broă, kă bro, bơsram sră, tìp măt lơh kwèng, cribơyai tàm bơta kòp gơbàn kal ke mờ jŏ jòng.

 Tàm pơrjum jơh gùt Ủy ƀan Dà lơgar bè Ơruh pơnu Việt Nam dơ̆ sơnrờp, ală kwang bàng đơs, nam 2021, kòp dờng Kovid-19 lơh gơrềng uă tus ơruh pơnu, broă lơh bơsram sră, rài kis, priă lơh geh gơtìp kal ke. Mơya, ală broă lơh bơh ơruh pơnu dê geh uă bơta pơnrơ, ơruh pơnu neh tơngŏ bơta tam klăc, tơrgùm bal pràn dùl nùs bal, geh kơnòl mờ Cíñ phủ mờ mpồl bơtiàn. Bal mờ hơ̆, ală anih lơh broă neh lơh ngan lam lơh ală broă lơh ơruh pơnu bal mờ gùng dà broă lơh dipal; lơh ală sră nggal bơto pơlam Adat ơruh pơnu nam 2020...Jăt mò Nguyễn Thị Bích Ngọc, Thứ trưởng Ƀộ Kế hoạc mờ Đầu tư đơs, tơngai tus, ơruh pơnu pal lam lài jăt bàn tŭ tơngai pa, pal sơlơ lơh broă bal mờ dunia, lơh pràn sơnđờm mŭt lơh broă, bơceh lơh. Mò Nguyễn Thị Bích Ngọc, đơs: Ƀộ Kế hoạc mờ Đầu tư neh pơgồp bal mờ ală ƀộ, gah lơh broă kâp dà lơgar, ală mpồl nàng dong kờl, pơgồp bal mờ Mpồl tam klăc ơruh pơnu Việt Nam tam pà broă rơndăp lơh priă jền tă dong kờl mpồl lơh sa kă bro dềt mờ di mơ. Tơngai tus, bol añ pơn jăt tai dong kờl ơruh pơnu tàm hơ̆ tơrgùm bơto, ătbồ mpồl lơh sa kă bro dềt mờ di mơ sơnđờm mŭt lơh broă bơceh lơh. Bè jŏ jòng bơtàu tơnguh ơruh pơnu tơngai bơh nam 2021- 2030, bol he pal lơh ală broă jàu sền swì cồng nha lơh jăt.

Jơh gùt anih bơyai lơh Pơrjum jơh gùt Ủy ƀan Dà lơgar bè Ơruh pơnu Việt Nam dơ̆ sơnrờp

Đơs tàm pơrjum, ồng Vũ Đức Đam, Phó Thủ tướng Cíñ phủ đơs sùm: Tŭ do, ơruh pơnu ờ hềt tơl 18 sơnam neh geh bơta gĭt wă mpồl bơtiàn, bè uă gah broă lơh jrô ơnàng rlau mờ uă rơnàng bèp rơnàng bi. Do là dùl tàm ală bơta lòng gơ tơlik tus ai Ủy ƀan Dà lơgar bè Ơruh pơnu Việt Nam in. Phó Thủ tướng ồng Vũ Đức Đam sồr, tơngai tus, Ủy ƀan mờ Đoàn ơruh pơnu kâp dà lơgar pal gĭt wă loh làng, lơh ală broă lơh broă nàng kờñ ngui niam geh bơta pràn bơceh lơh bơh ơruh pơnu Việt Nam dê tàm tŭ tơngai pa.

Đơs sùm bơta sền gròi bơh Cíñ phủ mờ Thủ tướng Cíñ phủ dê gơwèt mờ ơruh pơnu Việt Nam mờ broă lơh ơruh pơnu, Phó Thủ tướng ồng Vũ Đức Đam sồr ală ƀộ, gah lơh broă kâp dà lơgar geh gơrềng pal pơgồp bal niam mờ Ủy ƀan Dà lơgar bè Ơruh pơnu Việt Nam mờ Đoàn ơruh pơnu kâp dà lơgar lam lơh jăt ală broă lơh loh làng, jăt di jơnau sồr bơh Cíñ phủ dê. Phó Thủ tướng ồng Vũ Đức Đam sồr: Broă rơndăp lơh lơh jăt ơruh pơnu tŭ tơngai pa, broă lơh lam lơh ală broă jàu tơrgùm kờp ơruh pơnu Việt Nam, pal lơh gơs, kơ̆p kờñ đoàn ơruh pơnu lam lài tàm tŭ lơh jăt, ngui măy mok dong broă lơh srơh bơh ală mpồl cau dê ngan ngồn rlau. Gơhòi gơ jà cau jak, ơruh pơnu lik klờng bơsram jak ngan, broă do kờñ pal pơgồp bal niam đah gơnoar ătbồ mờ mpồl cau nàng srơh ngan ngồn rlau.

Phó Thủ tướng ồng Vũ Đức Đam đơs tàm pơrjum

Phó Thủ tướng ồng Vũ Đức Đam kơ̆p kơnờm tàm tŭ lam lơh ală broă lơh lơh broă bal mờ dunia bơh đoàn ơruh pơnu dê mờ đoàn ơruh pơnu ală lơgar tàm kơnhoàl ù tiah do mờ tàm dunia, ală ƀộ gah lơh broă kâp dà lơgar pal pơgồp bal lam lơh pràn kơldang rlau, nàng broă lơh do lơh broă bơh bơta đơng pơlam dong kờl bơh gơnoar ătbồ dê.

Tàm nam 2022, Ủy ƀan Dà lơgar bè Ơruh pơnu Việt Nam tơlik bàr pe kơnòl broă tờm, bè: Pơgồp kơlôi sơnơng, sồr lơh kơrnoăt, broă dong kờl bè ơruh pơnu mờ broă lơh ơruh pơnu; bơyai lơh cribơyai, tìp măt cribơyai broă lơh dong kờl ơruh pơnu; Pơgồp bal sồr ngan ală ƀộ, gah lơh broă kâp dà lơgar bal mờ ală tiah lam lơh jăt Adat Ơruh pơnu nam 2020, ală sră nggal pơlam lơh jăt Adat Ơruh pơnu nam 2020, Broă lơh bơtàu tơnguh ơruh pơnu Việt Nam tơngai bơh nam 2021- 2030; Bơyai lơh kờp sền, lùp kờp, sền swì broă lơh jăt gùng dà broă lơh, kơrnoăt boh lam gơwèt mờ ơruh pơnu bơh tơl 16 sơnam tus hơđơm 18 sơnam mờ bàr pe gah broă lơh ndai; Bơyai lơh broă lơh lơh broă mờ lơgar ndai dà lơgar bè ơruh pơnu.

Jăt VOV1- Cau mblàng Lơ Mu K’Yến