Tàm Pơrjum Kwang bàng kấp dờng Asean+ 3 dơ̆ 26, ală lơgar đơs nền tai bơta kwơ màng bơh lơh broă bal Asean+3 dê mờ ring lơngai, kơ̆ kơl jăp, lơh broă bal mờ bơtàu tơnguh. Kwang đơng lam bồ Asean+3 ring bal pơgồp bal lam lơh geh cồng nha Broă rơndăp lơh lơh broă bal Asean+3 tơngai bơh nam 2023-2027, tàm hơ̆ geh lơh jăt niam bơta pràn lơh broă bal bè lơh sa, kă bro, priă jền, gah lơh sơnơm... mờ rề ơnàng ală gah lơh broă bal pa, tơrgùm tàm tam gơl pa bơceh lơh, gàr tơl kòi phe, tam gơl năng lượng, tam gơl trồ tiah... wèt tus bơtàu tơnguh jơh ală bơta mờ kơ̆ kơl jăp. Thủ tướng Cíñ phủ ồng Phạm Minh Chính tơngŏ bơta kơ̆p kờñ Asean+3 rơ̆p geh gơnoar broă jơh nùs, geh cồng nha tàm broă ai tơlik ală broă lơh di pal, bal mờ gơ̆p sơr lèt gan ală bơta kal ke, bơta lòng tŭ do dê.

Tàm pơrjum Kwang bàng kấp dờng Asean mờ lơgar Mỹ dơ̆ 11, Phó Kwang atbồ lơgar Mỹ mò Kamala Harris đơs nền lơgar Mỹ hơ pràn kơl dang mờ jŏ jòng mờ Asean mờ tàm tiah do dê, kờñ Asean geh gơnoar broă tờm, đơs sùm 2 gah tam pà bal bơta kwơ, ai lài mờ wèt sền tơngai jŏ jòng, rcang sơndră bal ală bơta lòng bal. Tàm pơrjum Kwang bàng kấp dờng Asean mờ lơgar Canada, ală gah kung neh dùl nùs ring bal Jơnau yal bơr bal ngan ngồn lơh geh bơta gĭt gơ̆p lơh broă bal kwơ màng Asean mờ Canada. Ngai do, 7/09/2023, kwang đơng lam bồ ală lơgar rơ̆p pơrjum Kwang bàng kấp dờng Asean mờ Ấn Độ mờ Pơrjum kwang bàng kấp dờng tiah đah mat tơngai lik câu Á (EAS).

Bơdìh pơrjum, tàm ngai 6/09, Thủ tướng Cíñ phủ ồng Phạm Minh Chính neh tìp mat Thủ tướng lơgar Canada ồng Justin Trudeau, Thủ tướng lơgar Nhờk ồng Kishida Fumio, tìp mat mờ Kwang atbồ lơgar Hàn Quốc ồng Yoon Suk Yeol mờ Thủ tướng lơgar Lo ồng Lý Cường.