VOV4.K’ho- Mho ngai 03/10, tàm Hà Nội, Ƀộ Kông thương pơgồp bal mờ Ală mpồl lơh sa kă bro câu Âu dê tàm Việt Nam bơyai lơh Pơrjum ƀăo yal bè Pơrjum kwang bàng kâp dờng mờ Ràng tơlik lơh sa tơlir nam 2022. Geh lơh bơh ngai 28- 30/11 tus tàm ƀòn dờng Hồ Chí Minh, Pơrjum Kwang bàng kâp dờng mờ Ràng tơlik lơh sa tơlir nam 2022 geh bơta gơtha kwơmàng ngan tàm broă lơh jăt ală jơnau kơlôi lơh bơtàu tơnguh kơ̆ kơl jăp dipal mờ jơnau ring bal đah bàr gah Việt Nam mờ Mpồl tam klăc câu Âu (EU), pơgồp bơnah lơh jăt Broă lơh Dà lơgar bè gơguh tai tơlir bơh Việt Nam dê. Ràng tơlik lơh sa tơlir geh yal tơngĭt, ràng tơlik ală măy mok jak chài pa rài do, phan bơna bơkah niam ngan, jơnau kơlôi lơh mờ broă lơh sa tơlir, lơh sa tàm pơdar bơh ală mpồl lơh sa kă bro câu Âu mờ Việt Nam dê.

Bal mờ hơ̆, ală Cribơyai mờ Dơ̆ cribơyai tàm dơ̆ Ràng tơlik geh gơ gơs là bơnàng jă nàng tơnguh tai lơh broă bal đah ală mpồl lơh sa kă bro câu Âu mờ Việt Nam, pơgồp bơnah lơh gơlik dùl rài lơh sa Việt Nam tơlir, kơ̆ kơl jăp jŏ jòng bơh broă tam pà bal jơnau kơlôi lơh, jơnau kơlôi sơnơng mờ tàm jàu bơto pơlam ngui măy mok.

Cau cih VOV Tây Nguyên- Cau mblàng Lơ Mu K’Yến