Mho ngai 26/09, jăt jiơ tiah do dê, Dơ̆ bơyai lơh wă rò ngan ngồn Tổng Ƀí thư, Củ tịc lơgar ồng Tô Lâm mờ pơ ùr bal mờ mpồl cau ala măt kwang bàng kâp dờng lơgar Việt Nam còp kâp Dà lơgar tus lơgar Cuba geh lơh yŭ rơyùm tàm Hìu Kăc màng tàm càr lơgar La Habana. Tơnơ̆ dơ̆ bơyai lơh wă rò ngan ngồn tơn, Tổng Ƀí thư, Củ tịc lơgar ồng Tô Lâm bal mờ Ƀí thư dơ̆ dùl, Củ tịc lơgar Cuba ồng Miguel Diaz-Canel Bermudez lam bồ mpồl cau ala măt kwang bàng kâp dờng bàr lơgar dê mŭt pơrjum bơyai.

Bàr nă kwang đơng lam bồ đơs sùm bơta ndrờm bal đah Việt Nam mờ Cuba bè jơnau kah yau mờ bè huềng nùs, bè gùng lòt guh tus Củ nghĩa Xã hội mờ bơta gĭt gơ̆p kơ̆ kơl jăp neh geh Củ tịc Hồ Chí Minh mờ Kwang đơng lam bồ dờng ồng Fidel Castro bơ̆t bơtàu, sơrlèt gan bơh tŭ tơngai. Bàr nă kwang đơng lam bồ jơh nùs lơh ngan pơn jăt tai bơtàu tơngguh pràn kơldang bơta gĭt gơ̆p tam klăc bal ờs mờng bơh lài, is ồn lơh bơyô bal, lơh broă bal tơl làm đah Việt Nam mờ Cuba gơguh tus dùl gơnoar broă pa tơl làm, ngan ngồn, geh cồng nha mờ kơ̆ kơl jăp rlau. Bàr nă kwang đơng lam bồ ring bal pơgồp bal bơyai lơh niam Cribơyai Jơnau tàm sră pơ àr dơ̆ VI đah bàr Đảng mờ Cribơyai jak chài ală lơgar dơ̆ II bè bơta wèt sền kăc màng bơh Củ tịc Hồ Chí Minh mờ Kwang đơng lam bồ Kăc màng lơgar Cuba ồng Fidel Castro dê mờ ală broă lơh lơh broă bal ndai tàm tơngai tus.

Tàm dơ̆ pơrjum bơyai, Tổng Ƀí thư, Củ tịc lơgar ồng Tô Lâm yal mờ Ƀí thư dơ̆ dùl, Củ tịc lơgar Cuba ồng Miguel Diaz-Canel Bermudez bè broă Đảng, Dà lơgar mờ Làng bol Việt Nam jàu pà làng bol lơgar Cuba oh mi in 10 rbô tấn phe; Mpồl ala măt cau lơh broă dà lơgar Việt Nam pà Anih tờm ală cau lơh broă Cuba in mờ bàr pe tiah lơgar Việt Nam dê kung pà làng bol Cuba in bàr pe bơta phan bơna.

Mho ngai 26/09 jăt jiơ tiah do dê, Tổng Ƀí thư, Củ tịc lơgar ồng Tô Lâm neh tìp măt kâp dờng mờ Củ tịc Quôk hội Gơnoar ătbồ Làng bol Cuba ồng Esteban Lazo Hérnandez.