Pơrjum geh bơyai lơh tơn tơnơ̆ tŭ Cíñ phủ ai lơh jăt Broă lơh Lơh broă tơngai bơh nam 2022- 2026 lơh jăt Jơnau sồr sồ 15 bơh Ƀan Ƀí thư dê bè broă lơh cribơyai broă mờ lơgar ndai lơh sa drơng bơtàu tơnguh dà lơgar tus nam 2030. Đơs tàm pơrjum, Thủ tướng Cíñ phủ ồng Phạm Minh Chính đơs sùm sơlơ cribơyai broă mờ lơgar ndai lơh sa là broă lơh dờng bơh Đảng mờ Dà lơgar he dê tàm tŭ tơngai lơh pràn dà lơgar lơh sa mờ măy mok, măy mok lơh jơh lơm. Broă lơh Lơh broă bơh Cíñ phủ dê gĭt nền jơnau đơs “Bồ tơngoh kơlôi sơnơng bơceh lơh, lơh broă kràñ cê jơh nùs, lơh wơl ngac ngar, geh cồng nha, ngui mờ jòi tơl tŭ niam ai bơtàu tơnguh dà lơgar in” mờ ai tơlik 07 mpồl kơnòl broă tờm bè cribơyai broă mờ lơgar ndai lơh sa bơh tŭ do tus nam 2026. Thủ tướng sồr Pơrjum tơrgùm sền swì jrô broă, ngui tŭ jiơ niam nàng sơlơ tơnguh tai tăc phan mờ lơgar ndai, bơcri priă, lòt nhơl, jak chài- măy mok, ngui ală bơta gơn kơnờm gơguh tai pa. Bơh hơ̆ sồr geh ală broă lơh lam lơh geh cồng nha Broă lơh Lơh broă bơh Cíñ phủ dê, mờ nùs nhơm ai bơta sơbơng roh gơ gơs tŭ jiơ niam; gĭt nền ală broă kờñ pal tă bơsong tơn, lam lơh gờñ; ală pơlam gùng, kơnòl broă di mơ mờ jŏ tơngai.