VOV4.K’ho - Drim òr (28/04), tàm Hà Nội, Mpồl đơng lam bơ̆t bơtàu rơndăp broă “Tơn jơh 10 nam lơh jăt Nghị quyết Dà lơgar 8 khoă 11 bè broă sền gàr jŏ jòng Dà lơgar tàm bơta pa bơyai lơh pơrjum lơh jăt mờ tơn jơh 10 nam lơh jăt Nghị quyết Dà lơgar 8 khoă 11 bè broă sền gàr jŏ jòng Dà lơgar tàm bơta pa".

                                      Củ tịc lơgar ồng Nguyễn Xuân Phúc đơng lam pơrjum

Củ tịc lơgar ồng Nguyễn Xuân Phúc, Kwang atbồ đơng lam pơrjum. Đơs tơn jơh pơrjum, Củ tịc lơgar ồng Nguyễn Xuân Phúc đơs loh: Nghị quyết Dà lơgar 8 khoă 11 bè broă sền gàr jŏ jòng Dà lơgar tàm bơta pa là nghị quyết dờng ndrờm bal mờ jơi bơtiàn kòn cau, dà lơgar. Củ tịc lơgar ồng Nguyễn Xuân Phúc đơs tờm, Nghị quyết Dà lơgar 8, khoă 11 geh tơlik tàm tơngu me cồng nha broă mờng chài, lý luận mờ bơta mùl màl bơh mờr 30 nam tam gơl pa dà lơgar, neh pơn jăt tai 10 nam lơh jăt nghị quyết Dà lơgar 8, khoă 9 mờ broă sền gàr jŏ jòng Dà lơgar tàm bơta pa. Nghị quyết do geh gơnoar kwơ màng, tơlik gùng dà, bồ tơngoh pa, lơh pràn bè broă đơng lam bơh đảng gơwèt mờ kơnòl sền gàr dà lơgar tàm bơta pa.

Cau mblàng Ndong Brawl