VOV4.K’ho - Drim òr (14/10), tàm hìu lơh broă Đảng dà lơgar, Tổng Ƀí thư ồng Nguyễn Phú Trọng đơng lam mờ geh jơnau đơng lam kwơ màng tàm pơrjum lơh jăt Nghị quyết bơh Ƀộ Cíñ trị bè tơnguh bơtàu tiah Tây Nguyên tus nam 2030, wèt tus nam 2045.

Pơrjum lơh jăt Nghị quyết bơh Ƀộ Cíñ trị bè tơnguh bơtàu tiah Tây Nguyên

Tiah Tây Nguyên geh 5 càr, tàm hơ̆ geh: Kon Tum, Gia Lai, Dăk Lăk, Dăk Nông mờ Lâm Đồng geh git tus bè là dùl bă tiah ndu gơnrơh, là tiah geh ơm kis bal bơh 6 tơlăk nă cau gơwèt jơh ală jơi bơtiàn kòn cau oh mi tàm gùt lơgar dê. Đơs tàm dơ̆ đơng lam tàm pơrjum, Tổng Ƀí thư ồng Nguyễn Phú Trọng đơs tờm: Tiah Tây Nguyên là tiah kwơ màng bè lơh sa, mpồl bơtiàn, tiah kis niam brê bơnơm, sền gàr bơta lơngăp lơngai dà lơgar mờ lơh broă bal mờ lơgar ndai bơh gùt lơgar dê. Tơnguh bơtàu Tây Nguyên mhar, kơl jăp là gùng dà broă lơh dờng bơh Đảng, Dà lơgar mờ là kơnòl kwơ màng bơh gùt lơgar dê. Bơ̆t bơtàu mờ tơnguh bơtàu tiah Tây Nguyên pal pơgồp bal niam đah broă tơnguh bơtàu lơh sa, bơta chài rơgơi mpồl bơtiàn, sền gàr phan geh is, tiah kis, pơgồp bal nền nòn mờ broă sền gàr bơta lơngăp lơngai dà lơgar mờ tơnguh broă lơh bal mờ lơgar ndai. Ai broă tơnguh bơtàu lơh sa, bơta chài rơgơi, mpồl bơtiàn lơh tơngu me tờm ai broă sền gàr kơl jăp bơta lơngăp lơngai dà lơgar, kơ̆ kơl jăp cíñ trị mpồl bơtiàn.

VOV.vn – Cau mblàng Ndong Brawl