Tàm pơrjum, HĐÑZ càr Dăk Lăk neh bơyai lơh tơn jơh kơnòl broă Kwang geh jơng tàm UɃÑZ càr Dăk Lăk khoă X, tơngai lơh broă bơh nam 2016 tus 2021 gơwèt mờ mò H’ Yâo Knul, Ƀí thư Huyện ủy kơnhoàl Krông Ana, Kwang atbồ ƀan Kòn cau bơh UɃÑZ càr dê, tài neh tam gơl broă lơh ndai. HĐÑZ càr kung dờp cồng nha pồ bơtơl Kwang geh jơng tàm UɃÑZ càr Dăk Lăk khoă X, tơngai lơh broă bơh nam 2021 tus 2026 gơwèt mờ ồng Nguyễn Kính, Kwang atbồ ƀan Kòn cau bơh UɃÑZ càr dê.

Kung tàm pơrjum mìng dùl tơngu me dơ̆ 13 do, HĐÑZ càr Dăk Lăk tơrgùm cri bơyai, sền wơl 07 jơnau lơh nền kwơ màng, jal mhar, drơng broă đơng lam, atbồ lơh sa mpồl bơtiàn càr dê. Tàm hơ̆ geh ală Jơnau lơh nền: sơrbì Jơnau lơh nền bơh HĐÑZ càr bè broă ai priă tàm kes priă càr tus bal rơndăp broă bơcri priă lơh gùng Hồ Chí Minh gơl gùng pleh hờ đah măt tơngai lik ƀòn dờng Buôn Ma Thuột, càr Dăk Lăk; Jơnau lơh nền ai geh khà priă dong kờl priă sa ai kwang bàng, cau ling tàm mpồl K51 lơh kơnòl broă jòi rồ, tơrgùm ƀồc ntìng cau ling chơ̆t màng tàm lơgar bơdìh; Jơnau lơh nền ai geh tơngu me, khà priă tă lơh jăt Rơndăp broă “Bơ̆t bơtàu broă gùt mpồl bơtiàn bơsram tơngai bơh nam 2021 tus 2030”.